Portos de Galicia iniciará o dragado dos accesos á dársena de Foz

Nota de prensa:
PORTOS DE GALICIA EXTRAERÁ 10.000 METROS CÚBICOS DE AREA DO ACCESO Á DÁRSENA DE FOZ AO LONGO DESTE MES

A dragaxe urxente foi solicitada polos usuarios do porto debido á situación de inoperatividade ocasionada pola falta de calado e pola situación da zona tras os desperfectos ocasionados polo temporal Becky

A Consellería do Mar deu conta esta mañá no Consello do Goberno galego da actuación de emerxencia que Portos de Galicia está a levar a cabo na dársena interior do porto de Foz. Trátase dunha dragaxe de area na bocana da dársena, para garantir o calado necesario para a navegación en condicións de seguridade das embarcacións, que ata agora sufrían risco de varado.

A dragaxe executarase durante as vindeiras catro semanas e suporá a extracción duns 10.000 metros cúbicos de area, que permitirán devolver á zona o calado necesario para facilitar o acceso das embarcacións. Os áridos serán transportados a Ortigueira, onde se empregarán na constitución dunha praia urbana, poñendo en valor o material natural.

Os traballos veñen motivados pola situación anómala derivada da perda paulatina de calado na zona, especialmente acrecentada polos temporais como o Becky e as condicións meteorolóxicas dos últimos meses, que deixaron en risco de inoperatividade os accesos á dársena. Portos de Galicia vén defendendo a necesidade dunha dragaxe total da zona, porén, e dada a situación actual, decidiuse executar esta actuación parcial, ante a imposibilidade de dragar a totalidade da zona afectada, debido á falta de autorización para un punto de vertedura do total dos residuos.

Na súa recente visita á zona, o presidente do ente público, José Manuel Álvarez- Campana, comprometeu a dragaxe urxente en resposta á solicitude dos usuarios do porto, a confraría e o club náutico. A actuación está orzada en 245.794 euros.