O BNG de Barreiros levará adiante desde o concello a rexeneración do río Masma

Nota de prensa

O BNG LEVARÁ ADIANTE DESDE O CONCELLO DE BARREIROS E EN COLABORACIÓN CON OUTRAS ADMINISTRACIÓNS UN PLAN DE REXENERACIÓN E RECUPERACIÓN DO MASMA. PARA O FUTURO GOBERNO NACIONALISTA ESTE RÍO SERÁ A COLUMNA VERTEBRAL DUN NOVO MODELO DE DESENVOLVEMENTO TURÍSTICO SOSTIBLE E RESPECTUOSO CO MEDIO AMBIENTE.

Barreiros, 18 de maio de 2011. O BNG de Barreiros reuniuse no día de onte en Celeiro de Mariñaos, na antiga ponte do Barral sobre o río Masma, coa asociación veciñal da mencionada parroquia. Os membros da directiva do colectivo, Irmandade San Caetano, veñen demandando desde hai moito tempo a rexeneración do río Masma, a limpeza do seu cauce e das súas ribeiras e ofrécense tamén a colaborar con calquera institución que tome algunha iniciativa ao respecto, para devolverlle ao río Masma o esplendor e puxanza que tivo décadas atrás.

Pola súa banda, o Bloque Nacionalista Galego de Barreiros que durante os últimos anos tén levado a moitas institucións diversas iniciativas para a recuperación do río Masma, manifestoulles aos veciños de Celeiro o seu compromiso para iniciar desde o goberno de Barreiros as actuacións pertinentes para que en poucos anos o río Masma volva a ser o río que foi noutros tempos, xerando riqueza.

O futuro goberno nacionalista de Barreiros terá entre as súas prioridades o río Masma, xa que considera “que este importante recurso tén que ser a columna vertebral sobre a que se constrúa e desenvolva un novo concepto de turismo respectuoso co medio ambiente e non agresivo co entorno como veu acontecendo desgrazadamente, ata o de agora en Barreiros.

As propostas que o BNG presentou onte aos veciños ribeireños do Masma resúmense no seguinte plan de actuación:

-Limpeza do cauce do Masma.

-Limpeza e desbroce das súas marxes e ribeiras.

-Recuperación da súa riqueza piscícola (salmón, troita, reo, anguía, angula, sollas, lamprea…..).

-Recuperación do patrimonio arquitectónico e etnográfico que existe ao longo do Masma, como por exemplo a rehabilitación da histórica ponte do Barral ou a recuperación da antiga ponte que unía a Celeiro e Vilamar á altura da antiga “fábrica da luz”, poñendo tamén en valor este enclave e o seu entorno, así como a recuperación de antigos muiños.

-Recuperación das embarcacións tradicionais do Masma.

-Creación e posta en valor de novas rutas de paseo ao longo do Masma, que xa casi na súa desembocadura poderían enlazar á altura do Pozo Mouro cunha Ruta a San Estevo do Ermo, ao longo do río homónimo, afluente do Masma, e lugar emblemático de Barreiros.

-Elaboración de guías e diferentes soportes para a difusión e divulgación de todo o relacionado co río e o seu entorno.

O BNG apostará pola realización de actividades relacionadas co río Masma como: rutas en lanchas, recuperación dos descensos do Masma e deportes fluviais. Para levar a cabo a recuperación desta conca fluvial os nacionalistas implicarán a moitas institucións: Consellería de Medio Ambiente, Ministerio de Medio Ambiente, Rural e Mariño (o Masma está afectado por Costas nunha gran parte do seu curso), Deputación de Lugo, Grupo de Desenvolvemento Rural (GDR) da Mariña, Concello de Barreiros e tamén os outros concellos ribeireños na parte que lles toca: Mondoñedo, Lourenzá e Foz. E tamén colectivos veciñais e ecoloxistas.

Para o BNG “ésta é unha proposta realista e realizable que ao longo do tempo dará os seus frutos, xerará emprego na zona e fixará poboacion. Iniciativas coma ésta tiveron éxito e deron os seus frutos ao longo do tempo noutras comunidades do estado que apostaron por un turismo sostible, e tamén tiveron moito éxito en concellos de Galiza como Allariz que recuperando o río Arnoia convertíuse nun referente turístico a nivel internacional”, segundo explica o candidato á alcaldía de Barreiros, Antonio Veiga.

O tamén portavoz do BNG na actualidade no Concello barreirense subliñou que “o que non é realista nin de sentido común é defender nestes momentos a construcción dunha ponte entre os espigóns de Foz e San Cosme e gastar nesa arroutada nin mais nin menos que 2 millóns e medio de euros”.

Ao encontro celebrado onte en Celeiro de Mariñaos asistiron Ana Ermida, Montse Porteiro, Aurora Moreira e Antonio Veiga.