Nota de prensa:
GONZALO FERNÁNDEZ SUÁREZ OFRECERÁ O VENRES NO CENIMA DE FOZ UNHA CONFERENCIA SOBRE OS DESEMBARCOS VIKINGOS NA MARIÑA. A CHARLA ENMÁRCASE NOS ACTOS DA I FESTA NORMANDA DE RECUPERACIÓN DA MEMORIA HISTÓRICA.
Foz, 27 de xullo de 2011. O vindeiro venres 29 de xullo ás 20:30 horas no CENIMA terá lugar unha conferencia sobre os desembarcos vikingos na Mariña a cargo de Gonzalo Francisco Fernández Suárez, doctor en Historia pola Universidade de Santiago de Compostela e profesor da Área de Ciencias e Técnicas Historiográficas no departamento de Historia I, na Facultade de Humanidades no campus de Lugo. Fernández Suárez, nado en Taragoña (Rianxo), centra as súas investigacións no ámbito galego, nomeadamente no século XVI, en aspectos como a documentación municipal, as xuntas do Reino de Galicia, o notariado ou a nobreza galega.
Esta conferencia enmárcase dentro dos actos da I Festa Normanda de Recuperación da Memoria Histórica que se desenvolverá en Foz os días 26 e 27 de agosto. Desde a Asociación de Comerciantes, Industriais e Autónomos de Foz lembran que “os que desexen participar nesta importante cita coa historia xa poden mercar as súas vestimentas nos nosos establecementos asociados”.