O concello de Burela programará coa asociación de veciños e a comunidade de montes obras a cargo do PEIM

Nota de prensa:

BURELA INVESTIRÁ MÁIS DE 53.000 EUROS EN OBRAS CON CARGO AO PEIM DE 2012. GONZÁLEZ BARCIA E FERNÁNDEZ VALLE REUNÍRONSE CO VENCELLO E COA COMUNIDADE DE MONTES PARA PROGRAMAR AS ACTUACIÓNS.

Burela, 16 de xaneiro de 2012. Burela investirá máis de 53.000 euros en diversas obras, segundo ven de anunciar Manuel Fernández Valle, o concelleiro de Obras. Será con cargo ao PEIM, o Plan Estratéxico de Infraestructuras no Medio Rural deste 2012.

O Concello de Burela verá nos próximos meses como se realizan obras no seu termo municipal por importe de 53.105,25 euros, obras que tal e como indicou o concelleiro de Obras, e portavoz do Grupo Municipal Popular, Manuel Fernández Valle, estarán incluidas dentro do Plan Estratéxico de Infraestructuras no Medio Rural (PEIM).

Fernández Valle sinalou que “as obras a executar, tendo en conta a filosofía do PEIM, deberán referirse á parte rural do concello, polo que se considera prioritario facer actuacións en camiños xa existentes, en vez de construir novas infraestructuras, algo que conlevaría un aumento dos custos de mantemento a medio prazo”.

De cara a concretar as actuacións a levar a cabo, o pasado venres, día 13 de xaneiro, o alcalde burelés, José María González Barcia, xunto con Manuel Fernández Valle, mantiveron unha reunión a última hora da tarde con representantes da Asociación de Veciños O Vencello e da Comunidade de Montes en Man Común, para analizar as actuacións que agora mesmo se consideran prioritarias de cara a incluílas dentro do PEIM. Fernández Valle manifestou que “nos próximos días se procederá a elaborar a documentación pertinente, así como a valoración das obras, para facer xa unha relación definitiva, que se enviará á Xunta de Galicia”.

O concelleiro de Obras lembrou que “as actuacións do PEIM están financiadas na súa totalidade pola Consellería de Medio Rural e Mar da Xunta de Galicia e polo Ministerio de Agricultara de Goberno Central”. E tamén fixo fincapé en que “nos dous últimos anos, o goberno socialista de Rodríguez Zapatero incumpliu os seus compromisos coa Xunta que preside Alberto Núñez Feijoo. A chegada do PP ao goberno central vén de posibilitar que agora sí se reciban as aportacións do Estado para facer realidade o PEIM”.