Manifesto do PP de Ribadeo no día da muller traballadora

Nota de prensa:

POLA IGUALDADE

8 de marzo: Día da Muller traballadora

Unha das tarefas pendentes das modernas sociedades, e da nosa en particular, é a de conseguir a igualdade entre mulleres e homes a tódolos efectos e en tódolos ámbitos. Sabemos, e seguimos permitindo, que no noso Estado o traballo da muller non está equiparado ó do home, que hai cousas que seguen pertencendo á obriga das mulleres e outras ás do home, que existe unha violencia contínua contras as mulleres e que esta violencia está presente en tódolos campos: educación, familia, medios de comunicación, programas, … que as mulleres cobran menos que os homes, que se siga educando en valores decimonónicos que consagran unha visión masculina e outra feminina, que se inmortalice un modelo de familia, sociedade, estado, mundo,…. no que hai dúas partes e unha delas non se recoñece en igualdade.

É certo que recentemente o Secretario de Estado de Servizos Sociais e Igualdade afirmou que se identificarán e impondrán sancións económicas ós empresarios que paguen menos ás mulleres polo mesmo traballo, que levarán a cabo campañas de información e sensibilización para que as mulleres coñezan os seus dereitos (sobre todo no medio rural), que incentivarán fiscalmente e fomentarán medidas de formación e asesoramento para conseguir unha maior incidencia do colectivo feminino no mundo empresarial, que artellarán un plan de apoio para a conciliación da vida familiar e laboral que prevé garderías nas empresas, etc. Pero todas estas medidas, sendo un avance importante cara á consecución da igualdade, non serán suficientes sen unha educación continuada e unha axeitada posta a punto dos protagonistas principais.

É un feito tamén que a sociedade avanza e cada vez debemos ser máis os que sexamos conscientes non só do feito histórico da desigualdade senón do feito actual da acomodación a ditas circunstancias históricas. É o momento de que os homes amosen o seu coñecemento desta situación e da sua toma de conciencia fronte a esta equivocada realidade e do necesario cambio de rumbo neste futuro compartido. Tócalle ós homes xa estar aí, demostrar que participan desta evolución, que son conscientes, que saben, que queren en igualdade de condicións un futuro que compartir en igualdade.

Certamente as mulleres serán as protagonistas deste cambio, pero deben ser os homes tamén os que as sigan de forma solidaria e consecuente nesta tarefa, deben participar e coñecer as entrañas deste proceso, colaborar, corroborar,… é unha tarefa que nos incumbe a todos como seres humanos por respeto, por xustiza… e por sentido común.

Aínda hoxe a algúns, e tamén a algunhas, resúltalles estrano que un home se involucre cos colectivos de mulleres, comparta as súas reivindicacións ou colabore nestas tarefas. Creo que xa son chegados os tempos de que fagamos o traballo que se debe sen distincións de xénero, considerando soamente a xustiza e a consecuencia do vivir como seres humanos. Este cometido é o que pretendemos levar a cabo en tódalas facetas da nosa vida: na casa, no traballo, na escola, nas rúas, nos bares… ata converter a igualdade nunha condición máis do noso ser e non nun concepto que amosa o estigma dunha sociedade que se persegue coma un ideal utópico do noso futuro. Fagámolo realidade!!! Vivámolo no noso día a día!!! Convirtamos ese futuro para compartir nun PRESENTE DE IGUALDADE.