O BNG de Foz solicitan ao Concello que garantan o funcionamento do asilo despois do 30 de Xuño

Os nacionalistas solicitan ao Concello que garantan o funcionamento do centro despois do 30 de Xuño.

O BNG pregunta ao Alcalde se é certo que “Mensaxeiros pola Paz” abandona o Asilo de Foz 30 de Xuño.

Foz, 21 de abril de 2012.- O Bloque Nacionalista Galego diante dos insistentes rumores existentes entre os veciños e veciñas do Concello de Foz sobre a marcha do Concello da ONG que xestiona o Asilo de Foz o 30 de Xuño e sobre a posibilidade de que o centro poida pechar nesas mesmas datas solicita do Alcalde de Foz, na súa condición de representante da Corporación no Padroado, que explique publicamente a certeza destes supostos.

Segundo indicou Xoán Carlos G. Basanta, Portavoz Municipal do BNG, “a día de hoxe son moitas as persoas que se teñen dirixido a nos para manifestarnos a súa preocupación sobre a situación que se pode crear no Asilo de Foz no caso de que “Mensaxeiros pola Paz” abandona a xestión do centro o 30 de Xuño e tamén sobre as intencións que poidan existir no Padroado de cara a manter a actividade no mesmo como centro residencial para maiores. O Alcalde que representa a Corporación no Padroado ten que explicarlle aos veciños de Foz primeiramente se é certo que “Mensaxeiros pola Paz” ten previsto abandonar a xestión do asilo de Foz o 30 de Xuño e en segundo lugar no caso de que o anterior sexa certo que alternativas ten previstas o Concello para garantir que esta dotación siga a funcionar”.

“Foz non pode permitirse o luxo de non contar cun centro residencial de maiores” manifestou Basanta quen lamentou “a falla de compromiso do Goberno da Xunta para continuar adiante co centro residencial que no seu momento tiña aprobado a Vicepresidencia da Xunta en mans do BNG e que apoiaba o conxunto da corporación. Agora ben, sen renunciar a esa dotación e até non contar con esa nova infraestrutura é necesario garantir que o asilo de Foz siga a funcionar xa que a dia de hoxe atende a 38 usuarios, que no caso de fechar pasarían a unha situación incerta, e que ademáis da traballo a 12 persoas, e que por conseguinte provocaría tamén un problema na orde laboral. En definitiva queremos un compromiso firme por parte da Alcaldía de que o centro vai seguir funcionando e tamén demandamos do Goberno Local un compromiso claro, neste caso orzamentario co centro”.

O Portavoz nacionalista recalcou que “a Alcaldía debe aclarar tamén se por parte do Concello se están a cumprir os compromisos orzamentarios que existían co Padroado e se desde o Goberno Local se atenderon as peticións de axuda económica que se lle teñen feito por parte do mesmo. Non nos interesa coñecer as contas do centro, pero sería bo que desde a Alcaldía se explicase aos veciños se é certa a situación de penuria económica que atravesa o centro e que tería mesmo provocado que algúns provedores deixaran de servir ao Padroado e que mesmamente o Padroado se vise privado de facer fronte a gastos que son básicos para manter a calidade de vida dos residentes ou que mesmamente se adebeden nóminas aos traballadores do centro”.

Os nacionalistas insistiron “ na necesidade de aclarar se o centro vai continuar a súa actividade no caso de que a ONG que a rexente o abandone o 30 de Xuño e de que a Alcaldía garanta o seu funcionamento, tanto con achegas por parte do Concello, tanto xestionando fondos diante doutras administracións como pode ser a Xunta de Galiza ou a Deputación. Un alcalde non pode vivir na oposición senón dando solucións aos problemas dos seus veciños, e é precisamente aquí onde se ve, a súa capitación para o cargo” .

Remitido