A piscina climatizada de Lieiro, Cervo, incrementou o número de socios nun 15% no último ano

A piscina climatizada de Lieiro incrementou o número de socios nun 15% no último ano

-Os asociados reais, que inclúen todos os socios que se benefician das cotas familiares aínda sen ser titulares, chegan aos preto de 700

Cervo, 7 de agosto de 2012-A piscina cuberta de Lieiro gañou socios no último ano. Entre xuño de 2011 e xuño de 2012, o número de persoas que pagan unha cota fixa pasou das 374 ás 439. Deste xeito, os socios aumentaron en case un 15% en 12 meses.

Cabe destacar que estes datos refírense unicamente ás persoas asociadas, pero existen numerosos usuarios que aboan a cota familiar, o que significa que hai un titular, que é o que consta como socio, pero hai máis membros da unidade que utilizan as instalacións. Tendo en conta este aspecto, o número de asociados reais aumenta ata os preto de 700, case 100 máis que no 2011. Tamén hai que salientar a existencia de moitos usuarios que non son socios e que acceden a través do pagamento dunha entrada puntual ou con bonos de 10 baños que non están contabilizados nestes datos. Ademais, hai datas especiais nas que o número de usuarios dispárase, como foi a pasada Semana Santa, cando en 7 días se rexistraron ao redor dun milleiro de accesos.

Ademais do acondicionamento e mantemento das instalacións da piscina climatizada para o seu uso diario, o Concello organiza numerosas actividades e cursos “para fomentar a súa utilización e potenciar a práctica de deportes acuáticos, que son moi beneficiosos para a saúde” explica a edil de Deportes, Yolanda Pedreira. Este curso pasado ofreceuse iniciación á natación, perfeccionamento, mantemento, aquagym e preparación de probas, neste último caso pensado para opositores. En total foron 210 as persoas que participaron nestas actividades, adaptadas ás solicitudes dos usuarios. De feito, no caso do aquagym, a elevada demanda levou ao Concello a crear un grupo máis. Ademais, esta actividade prolongouse ata o mes de xuño a petición dos beneficiarios, que querían seguir practicando estes execicios.

A piscina de Lieiro permanece pechada no mes de agosto, como é habitual, e durante estas semanas estanse realizando traballos de mantemento. Aínda así, neste tempo as instalacións deportivas do complexo, como son o ximnasio ou a sauna, permanecen abertas. Aínda así, as persoas que desexen darse un baño na piscina poden acudir ás instalacións de Río Covo, que dispoñen de dous vasos. O día 3 de setembro a piscina de Lieiro volverá estar aberta e no mes de outubro arrincarán os cursos.