A XUNTA DESTINA MÁIS DE 3,3 MILLÓNS DE EUROS Á VIXILANCIA E XESTIÓN DOS BANCOS MARISQUEIROS DE GALICIA
· A Consellería do Medio Rural e do Mar asinará dous convenios coas confrarías de Galicia, un deles para controlar o acceso ás zonas de pesca e o outro para xestionar as zonas de producción
As confrarías de Galicia beneficiaranse de dous convenios, un deles para controlar o acceso ás zonas de pesca e outro para a xestión das zonas de produción. O Consello da
Xunta aprobou hoxe a sinatura destes dous acordos entre as confrarías e a Consellería do Medio Rural e do Mar, por un importe de máis de 3,3 millóns de euros.
Os convenios para o control de acceso ás zonas de pesca que se asinarán coas confrarías teñen como finalidade a conservación, protección e sustentabilidade dos recursos mariños mediante operacións de salvagarda do medio mariño e das súas especies. Ademais, para dar cumprimento ao convenio, os asociados ás confrarías deberán coidar, controlar e facer un seguimento dos bancos marisqueiros establecendo as condicións de acceso ás zonas de pesca. O departamento que dirixe Rosa Quintana investirá 2.246.309 euros nestes convenios.
Por outra banda, os convenios para a xestión de zonas de produción teñen como obxecto realizar actividades que permitan a implantación de técnicas de semicultivo,
elaboración de proxectos de rexeneración de zonas de produción e facer un seguimento dos bancos. Neste sentido, o acordo prevé a realización de mostraxes de poboacións
dos principais bancos marisqueiros, a elaboración e seguimento dos plans de xestión, a recollida e envío ao Intecmar das mostras que amosan o estado das augas e a
elaboración e seguimento dos proxectos de rexeneración de zonas improdutivas. A Consellería do Medio Rural e do Mar destina 1.102.380 euros a este acordo.
O importe de ambos os convenios será cofinanciado polo Fondo Europeo da Pesca nun 61%, correspondendo o restante á Administración autonómica. A súa vixencia será de
12 meses a partir da súa sinatura.