O pleno de Lourenzá acordou regular as distancias das plantacións para adaptalas á Lei de Montes

RESUMO DO PLENO DE HOXE

Lourenzá, 18 de agosto do 2012-08-17

Retribucións altos cargos municipais

No Pleno celebrado no día de hoxe no Concello de Lourenzá aprobouse por unanimidade eliminar ao Alcalde Vidal Martinez-Sierra e ao tenente alcalde Dino Vidal a paga extra de Nadal en consonancia a eliminación da mesma paga aos funcionarios.

Ordenanza fiscal reguladora da taxa pola utilización de locais municipais

Esta taxa de recente creación, novembro 2011, quedara incompleta por non regular o uso dos locais do Recinto Feiral. Dende hoxe queda marcada a taxa en 10 €/hora agás para aquelas asociacións do concello que non deberán aboar nada ao igual que no resto dos locais municipal. Aprobada cos votos a favor do PP e do BNG e en contra do PSOE.

ALCOA

Hoxe rexistrouse no Concello a petición de apoio que piden o comité de empresa de ALCOA en relación a tarifa eléctrica que garante os postos de traballo. Neste senso, tendo en conta unha moción partidista e xenérica levada a debate a este pleno polo BNG sobre o que eles din “futuro da mariña”, e no que un dos puntos pedía instar ao Goberno do Estado a poñer en marcha unha tarifa eléctrica que garanta a continuidade da Multinacional ALCOA, tomouse o seguinte acordo por unanimidade:

1.°) Trasladarlle ao Goberno de España a recomendación de impulsar un acordo urxente de prezos entre as empresas produtoras de electricidade e os grandes consumidores, que implique unha minoración dos actualmente vixentes ata o 31 de decembro, e un horizonte superior a cinco anos, que faga posible o desenvolvemento dos plans estratéxicos das industrias afectadas.

2.°) Unha revisión das tarifas de acceso para os grandes consumidores de enerxía que inclúan só e exclusivamente os custos asociados ás redes e aos de operación do sistema.

3.°) Que se manteña o servizo de xestión de interrumpibilidade da demanda.

4.°) Que poña en valor o carácter estratéxico das plantas de Alcoa en Galicia, pola súa produción de alumina e aluminio, polo súa achega ao valor engadido e polo volume de emprego xerado.”

Este é o mesmo acordo que no Pleno do Parlamento do 10 de abril do 2012 se adoptou por unanimidade dos tres grupos da cámara.

Festas Locais

Por unanimidade o pleno acorda manter festivos locais o luns do Conde Santo e o Martes de Entroido para o ano 2012

Ordenanza de Camiños

En vista a alegación que CONFEMADERA presentou no concello en relación a Ordenanza Reguladora do uso e aproveitamento de vías públicas e pistas municipais do concello no tocante ao artigo que recollía a autorización para o depósito, corta, carga e transporte de madeira e os seus derivados e autorización para uso de camiños forestais, o Pleno do Concello por unanimidade considerou atender a alegación e facer extensiva o uso das vías municipais tamén a calquera outra actividade extraordinaria que afecte ao estado ou a conservación destes viais.

A alegación viña a considerar un trato discriminatorio á actividade forestal regular tan só o uso das vías para esta actividade.

Recordamos que a regulación establece unha fianza para o uso das vías municipais que queda fixado en 1€/m con un máximo de 3000 € para os camiños e 2€/m co nun tope de 4.000 €/m para as estradas, sendo o tope máximo da fianza 6000 €.

Esta fianza será devolta nun prazo máximo de 1 mes dende a data en que se reclame a devolución ao Concello e servirá para o arranxo das vías en caso de que o responsable da actividade que se desenvolva non o faga sen prexuízo das accións legais que se tomen.

Por outro lado, hoxe entra en vigor a lei 7/2012 de Montes de Galicia que a través dunha disposición transitoria marca un prazo de 1 ano para adaptar as distancias de plantacións fixadas en ordenanzas municipais as distancias que recolle a propia lei no anexo II, por ese motivo, no pleno de hoxe adoptouse por unanimidade o acordo de modificar o artigo da ordenanza relativo as distancias de plantación para que estas se ateñan ao disposto a normativa autonómica (Lei de Montes e Lei de defensa e prevención de incendios forestais)