A Deputación esixe á Xunta que aclare o número de prazas de mestre que non se cubrirán na provincia

O VICEPRESIDENTE DA DEPUTACIÓN ESIXE Á XUNTA QUE ACLARE O NÚMERO DE PRAZAS DE MESTRE QUE NON SE CUBRIRÁN NA PROVINCIA

Veiga asegura que “o PP converteu o inicio do curso nun duro golpe para as familias, que terán que gastar unha media de 300 euros máis”

“O Goberno galego iniciou a lexislatura suprimindo a gratuidade dos libros de texto e remátaa eliminando mestres, centros, programas como preescolar na casa e reducindo bolsas para comedores e liñas de transporte”

Lugo, 7 de setembro de 2012. O vicepresidente da Deputación de Lugo e delegado das áreas de Benestar Social e Deporte, Antonio Veiga, reuniuse, esta mañá, con representantes da Federación Provincial de Apas de Lugo (Fapacel) para valorar o inicio do curso escolar marcado pola redución de mestres e pola suba do IVE no material escolar.

Tras o encontro, Veiga denunciou a deriva que para o ensino público supuxo o Goberno de Núñez Feijóo. “Estamos a piques de iniciar un curso escolar no que o conselleiro de Educación, Jesús Vázquez, xa manifestou que non se reporán as prazas de mestres de infantil, primaria e secundaria que se xubilan este ano, o que supón, só na nosa provincia, máis de 200 profesores menos, e a ese dato hai que sumar as prazas de persoal de apoio que non se cubrirán e que obrigarán a un mesmo mestre ou mestra a dar clase até en catro centros de diferentes concellos como Láncara, Triacastela, A Pobra de Brollón e Samos”.

“Ademais – continuou o vicepresidente da institución provincial- as declaracións do conselleiro afirmando que até xa comezado o curso non se saberá o número de prazas que quedarán vacantes e o número definitivo de interinos, demostran a falla de planificación da consellería. Non sería estraño que se estiveran ocultando os datos reais pola coincidencia coa precampaña electoral e por iso pedimos á Xunta que aclare, de xeito inmediato, o número de prazas que non se cubrirán na provincia de Lugo”

Dende a Vicepresidencia da Deputación insístese en que a actual Xunta de Galiza pasará á historia por ser o executivo que máis recortes realizou en educación e que máis favoreceu, de xeito descarado, ao ensino concertado. “O PPdeG comezou a lexislatura suprimindo a gratuidade dos libros de texto e remátaa eliminando bolsas, centros, como o colexio infantil de Chantada, unidades educativas, mestres e servizos como preescolar na casa que atendía a 1.200 familias lucenses e cunha importante repercusión no medio rural, ademais de reducir as bolsas e as axudas para os comedores e o transporte escolar”.

“Tanto o Goberno autonómico como o Goberno do Estado –enfatizou Veiga- empregan a crise como coartada para atacar ao conxunto dos servizos públicos. As súas políticas están a incrementar a fenda existente con Europa no que a gasto educativo se refire, e estas políticas xeran máis paro, máis desigualdade e máis atraso económico e social.”

Neste contexto, e tendo en conta a suba do IVE en material escolar, Veiga denuncia que “O PP converteu o mes de setembro nunha longa costa de xaneiro que será permanente e á que contribúe a supresión da paga de Nadal dos empregados públicos. As súas políticas de contención do déficit público están a provocar que o inicio do curso escolar sexa un duro golpe para a economía das familias que terán que desembolsar unha media de 300 euros máis”.

Dende a Vicepresidencia da Deputación urxen á Xunta de Galiza a que rectifique a súa política educativa. “A redución de axudas á escola concertada e a supresión dos concertos cos colexios que segregan por sexos, permitiría manter a gratuidade dos libros de texto para moitas familias así como as axudas para os comedores”.