Xoves remata o prazo para inscribirse nas escolas deportivas municipais de Burela

ATA O XOVES ESTÁ ABERTA A INSCRICIÓN NAS ESCOLAS DEPORTIVAS MUNICIPAIS DE BURELA.

Burela, 25 de setembro de 2012. O vindeiro xoves, 27 de setembro, ás 14 horas remata o prazo para inscribirse nas escolas deportivas municipais que organiza o Concello de Burela para os nenos e nenas nados entre 1996 e 2007. En todas as actividades ofertadas existe un número máximo de prazas, que será de 15 por grupo, “co obxectivo de que aseguren o correcto funcionamento dos grupos, así coma un número mínimo para poder levalas a cabo”, segundo explica a concelleira de Deportes, Beatriz Piñeiro.

As fichas de inscrición deben presentarse na Casa da Xuventude antes das dúas da tarde do vindeiro xoves. Desde a Delegación de Deportes advirten de que “todo aquel que non teña formalizada e entregada a ficha correspondente non poderá asistir á actividade ata realizar dito requisito”. A adxudicación das prazas realizaráse por rigorosa orde de inscrición. A partires do venres, 28 de setembro, faráse pública a lista de admitidos na Casa do Concello.

As actividades que se ofertan son: bádminton, patinaxe artística, tenis de mesa, xogos tradicionais, ballet, patín lúdico e tenis.

A tempada 2012/13 dará comezo o 1 de outubro e rematará o 31 de maio.