O BNG DA MARIÑA INICIA UN PROCESO DE REFLEXIÓN INTERNA TRAS UNS RESULTADOS ELECTORAIS QUE CONSIDERAN MALOS PARA A COMARCA E MALOS PARA O PAÍS
Antonio Veiga asegura que o Bloque Nacionalista Galego quere seguir sendo unha ferramenta útil na resolución dos problemas dos mariñáns
Os nacionalistas agradecen o apoio recibido e comprométense a seguir traballado na defensa dos dereitos dos cidadáns
A Mariña, 24 de outubro de 2012. O Bloque Nacionalista Galego da Mariña iniciou onte, coa xuntanza do consello comarcal, un período de reflexión interna motivado polos resultados obtidos pola formación na xornada electoral do pasado domingo, que vai ter continuidade nas asembleas comarcais e no consellos nacional, así como noutros órganos da organización nacionalista.
O responsábel comarcal do BNG, Antonio Veiga, asegurou, esta mañá, que “é preciso unha análise sosegada de cada un dos motivos que levaron á formación á debacle electoral non só porque os resultados son malos para o BNG senón tamén porque son malos para A Mariña, para Galiza e para todas as galegas e galegos, xa que o Partido Popular volve a ter maioría absoluta e vai a seguir aplicando políticas de recortes que continuarán afectando ao funcionamento dos servizos públicos e cuxas consecuencias seguirán sendo máis severas para os traballadores, os parados e as persoas maiores. ”
‘O BNG – continuou Veiga- quere seguir sendo unha ferramenta útil na denuncia e resolución de todos aqueles problemas que afectan aos mariñáns e para iso temos que volver a gañar a confianza dos cidadáns’.
Dende a formación nacionalistas agradecen o apoio recibido por todos aqueles que confiaron no BNG e que participaron nos actos de campaña así como o traballado realizado polos membros da organización, e comprométense a seguir traballando na defensa dos dereitos dos mariñáns e das potencialidades da comarca.