Pobre, desigual, irresponsable, inculto … ?

Tomo o primeiro café da mañá mentres vexo a prensa, atónito e anonadado. Enterome por EuropaPress que “Las pensiones gallegas de jubilación son 167 euros inferiores a la media”. Leo no xornal coruñes La Voz de Galicia que “España retrocede 14 puestos en el índice de igualdad de género”. Atopo tres perlas no suplemento de El Progreso na Mariña; por un lado que “El BNG no se plantea ningún cambio a nivel comarcal por los resultados del domingo” e por outro que “Rego obligará al comité provincial del PSOE a tratar la dimisión de Pachi Vázquez”, tamén, e noutra nova, que “La Falage se queda a un paso de la extinción”. Finalmente, o periódico de Lugo descubre que “La dejadez de los partidos hace que Lugo continúe sin autoridad portuaria”.
Quería pedir outro café pero desisto. Sinto eses ardores cafeteiros matinais que tanto me alegran os días. Esfórzome por disimular a dolor e pido unha auga. Non podía ser menos, catalana; aquí non hai.
Mentres, volvo ao rego. Resulta que a comunidade máis solvente do estado, case a menos endebedada, ten os cidadáns xubilados que cobran 167 euros menos ao mes.
Pasa que as igualdades desaparecen coa connivencia das persoas afectadas, que votan a quen potencia as desigualdades ou quédanse na casa agardando a ver se mellora o día.
Sucede que a desfeita do BNG na Mariña é culpa dos electores. So faltaría. Ramón Ermida e os seus mariachis nada teñen que ver, nin nesta derrota nin nas pasadas, nin nas próximas. O pobo non se decata.
Acontece, que Rego, Ismael o de Santiago, que pechaba a lista do PSOE por Lugo, que se retiraba da política galega, agora ameaza con promover a dimisión de Pachi Vázquez. Debe contar co apoio de Alfredo Llano e García Rivera.
Por outro lado, anuncian que a Falanxe está a un paso da extinción. Non lin máis. Non sei si é por defunción por eutanasia, por defunción natural, por fusión, por absorción por integración ou porque agora votan ao PP. É igual, non existe memoria, nin do 33 nin do 77 nin do 89. Manda güevos.
Non sei si serei capaz de rematar. Chéganme os ardores ata o esófago. Servíronme auga con gas e non podo tomala. Co primeiro trago cambioume o rictus da cara.
Vou aguantando. Retomo e leo que Lugo non ten autoridade portuaria pola deixadez dos partidos. Certo. Certo e cómodo. Lugo non ten, entre outros servizos, o da autoridade portuaria pola falla de interese e connivencia dos poderes, todos, que o permiten, protexen, potencian e explotan. Non so os partidos. Os cidadáns da Mariña debería dicir algo sobre isto, e máis, por diante de Lugo, que queda lonxe. A nova non deixa de ser o comezo dun novo ciclo económico.
Definitivamente teño que tomar a decisión de cambiar de bar, aquí líome moito.
Segundo S.