As castañas chegan con forza a Cervo nunha tarde gastronómica e lúdica
-O sábado coñeceranse os gañadores do concurso de sobremesas e de debuxo infantil nunha xornada que rematará cun magosto popular
Cervo, 15 de novembro de 2012-Cervo vivirá este sábado unha xornada tipicamente outonal na que un dos produtos máis tradicionais desta época, as castañas, acapararán todo o protagonismo. Tres actividades diferentes, gastronómicas e lúdicas, permitirán exaltar a castaña entre o público infantil e adulto. En concreto trátase do concurso de sobremesas elaboradas con este alimento, o certame de debuxo infantil e o magosto popular. O Concello xa está inmerso na organización destas actividades. Esta mañá a edil de Educación, Pilar Armada, a de Cultura, Begoña Alonso e representantes de varias entidades colaboradoras estiveron participando nos últimos preparativos.
As actividades comezarán ás 16:00 horas, coa recepción dos pratos que se presenten á I Larpeirada de ourizo de outono, o concurso de sobremesas e outras especialidades doces coa castaña como ingrediente principal. Ditos pratos serán numerados, fotografados e colocados para que o xurado os poda degustar sen saber o nome do autor. Un xurado que estará composto por membros de asociacións como Alborada e Mulleres de San Ciprián, que elixirán as tres mellores sobremesas.
Despois de ter probado e valorado todos os pratos concursantes, dará comezo o I Concurso infantil de debuxo “A Castaña”, no que a temática estaba centrada neste froito. Representantes das ANPAS dos centros educativos cervenses e doutras asociacións formarán parte do xurado deste certame.
Unha vez valorados tanto os pratos como os debuxos, os respectivos xurados emitirán o seu veredicto e ás 17:30 horas terá lugar a entrega de premios de ambos concursos. Ao remate dará comezo o magosto popular, no que o Concello preparará e servirá 50 quilos de castañas.
“Queríamos que los cervenses tuvieran varios motivos para salir a la calle y disfrutar con actividades relacionadas con las tradiciones de esta época” explica a edil de Cultura, Begoña Alonso. “Pero además, buscábamos que los eventos consiguieran convocar a público adulto e infantil en una jornada en la que no podía faltar el magosto para festejar el otoño” engade Alonso.