Profesorado do IES Illa de Sarón de Xove expón o seu apoio ás medidas de presión como protesta

O Claustro de profesoras e profesores do IES Illa de Sarón de Xove quere mostrar o seu apoio ás medidas de presión que se están a levar a cabo como protesta contra as políticas dos diferentes gobernos polos seguintes MOTIVOS:

Desde o punto de vista educativo

O ataque permanente ao ensino público galego que se manifesta:

Na redución orzamentaria de 425 millóns de euros nos últimos anos.
Nas supresión de centos de unidades.
Na redución de 2500 profesores e profesoras e, polo tanto, do profesorado dos centros.
Na redución do profesorado de atención ás necesidades educativas específicas.
No incremento das ratios.
Na non cobertura das baixas do profesorado.
Na redución da oferta de Bacharelato e da implantación da FP.
Na redución desproporcionada das bolsas de estudos.
No incremento das taxas universitarias que dificultan o acceso e a continuación dos estudos universitarios.

O anteproxecto da LOMCE, porque se trata de…

un proxecto de lei recentralizador, antidemocrático, segregador e elitista, que ataca a igualdade de oportunidades, impide o acceso de todas e todos a unha educación de calidade e pretende, non só favorecer o ensino privado concertado, senón mesmo trasladar o modelo de funcionamento dos centros privados aos públicos, mediante un sistema que soamente servirá para que o ensino perpetúe as desigualdades sociais, cando debería de combatelas.
un proxecto de lei que pon en cuestión o dereito universal á educación, vai impedir o acceso á educación ás clases populares, invade competencias das comunidades autónomas, crea centros de elite e liquida a xestión democrática dos centros.

Desde un punto de vista xeral

A reforma da lexislación laboral, que provocou un retroceso sen precedentes nos dereitos dos traballadores e traballadoras, tanto no plano individual como no colectivo.
As políticas antisociais, chamadas de austeridade, que poñen en perigo os fundamentos do Estado Social: educación, sanidade e servizos públicos.
As medidas económicas e fiscais que están a agravar a crise, incrementando o desemprego, a pobreza e a exclusión social.
O sacrificio da cidadanía menos podente. Séguese castigando á maioría da sociedade e pondo en perigo as pensións públicas, mentres as elites económicas financeiras se salvan da crise e incluso sacan beneficio dela.