Cervo acolle unha mostra de Óscar Villarquide na que amosa retratos naturais e híbridos ata o 31 de marzo

Cervo acolle unha mostra inédita do mariñán Óscar Villarquide na que amosa retratos naturais e híbridos

Cervo, 26 de xaneiro de 2013-A primeira exposición individual do artista burelés Óscar Villarquide xa se pode visitar no Centro Cultural e de Servizos á Cidadanía de Cervo. Esta tarde o edil cervense Luis Guillén así como representantes da asociación organizadora, A Sombriza, e o propio autor participaron na inauguración desta mostra inédita xa que ata o de agora non se exhibira nunha sala de exposicións.

Trátase dun compendio de obras deste artista titulado “A natureza do rostro. Retrato e hibridación” no que se poden ver 17 cadros, a maior parte deles óleos, aínda que tamén hai gravados e debuxos. En todos os casos existe unha liña temática, como son os retratos, a meirande parte de persoas achegadas como familiares e amigos, dos que o artista pretendeu captar e plasmar a esencia da súa personalidade.

Villarquide toma como base as fotografías das persoas ás que quere retratar e a partir delas pinta a man alzada. Cabe destacar que o artista non se limita a debuxar o que ve, senón que lle dá o seu toque persoal aos rostros, ás súas expresións e ás súas proporcións, buscando capturar a súa naturalidade e potenciar os seus trazos característicos.

Ademais, a mostra conta con catro retratos híbridos nos que o autor mestura e superpón os rasgos faciais de varias persoas dando lugar a un rostro composto. Con estes cadros híbridos, Villarquide inicia unha serie á que pretende darlle continuidade.

Óscar Villarquide vive en Burela pero a súa familia procede da parroquia cervense de Rúa, onde o artista viviu ata os catro anos. De formación artística, este mozo de 25 anos xa comezou a trazar o seu futuro na pintura aos 18 anos, cando empezou a crear as súas primeiras obras. Cursou o Bacharelato na modalidade de Artes no IES Monte Castelo de Burela e seguiu a súa formación na mesma rama licenciándose en Belas Artes. Villarquide ten participado en numerosas exposicións colectivas, pero esta é a primeira na que as súas obras son as únicas protagonistas.

Esta exposición enmárcase no programa “Novos artistas, novos valores” da asociación A Sombriza, a organizadora da mostra. A edil de Cultura, Begoña Alonso asegurou que esta iniciativa “es muy interesante ya que da una oportunidad a esos artistas incipientes que tienen mucho arte que ofrecer y que compartir con el público, que esperamos acuda a ver esta exposición”. A concelleira destaca que “a pesar de su juventud, Óscar va definiendo su estilo e incluso empieza a crear series como la de los retratos híbridos, que demuestran mucha determinación por seguir trabajando y creciendo como artista”.

A exposición permanecerá aberta ata o 31 de marzo, en horario de luns a venres de 10 a 13 e de 17 a 20 horas no Centro Cultural e de Servizo á Cidadanía de Cervo.