O Castelo proclámase o gañador do XVIII Campionato de Tute Concello de Cervo

O Castelo proclámase o gañador do Campionato de Tute Concello de Cervo

-O Mesón da Ría e O Trasgo séguenlle na clasificación empatados a 75 puntos
-Cachito e Moncho, do Castelo, resultaron ser a parella con mellor puntuación
-Os trofeos entregaranse o día 25 de xaneiro nunha cea que terá lugar no Castelo

Cervo, 9 de xaneiro de 2013-O XVIII Campionato de Tute Concello de Cervo disputado nos meses de novembro e decembro xa ten gañador. O equipo do restaurante O Castelo resultou o vencedor absoluto con 79 puntos, seguido do Mesón da Ría, que quedou segundo, e do Trasgo, terceiro clasificado. Estes dous últimos están empatados a 75 puntos, polo que os seus postos na táboa resolvéronse a través do mesmo método utilizado no fútbol para desfacer os empates, o gol average.

Estes equipos recibirán os correspondentes trofeos ao ter quedado entre os tres primeiros. En canto á parella con mellor puntuación foi a formada por Cachito e Moncho, tamén do Castelo, que acadaron 26 puntos. Todos os trofeos serán entregados o venres 25 de xaneiro durante a cea que todos os anos celebran todos os participantes do campionato, que nesta ocasión e por primeira vez terá lugar no Castelo, coincidindo casualmente co establecemento do equipo gañador.

Esta competición, cunha longa tradición no municipio, conseguiu manter nesta edición o mesmo nivel de participación que noutras ocasións, con preto de 60 persoas xogando ao tute distribuídas en sete equipos vinculados ao mesmo número de establecementos e locais de restauración: O Castelo, Mesón da Ría, O Trasgo, Paulino (equipo gañador na anterior edición), Río de Oro, Camarote e Pedregal. Así, durante máis de mes e medio, dende o 6 de novembro ata o 20 de decembro, os equipos enfrontáronse entre eles todos os martes e xoves.

A edil de Deportes quere transmitir os seus parabéns á parella gañadora e tamén aproveitou para darlles as grazas a todos os participantes por “tomar parte neste campionato de Tute que foi posto en marcha coa idea de fomentar a convivencia e a socialización e ao mesmo tempo, dinamizar o sector hostaleiro local”.