Centos de persoas protestaron en Burela para rexeitar a área sanitaria única

A Plataforma na Defensa da Sanidade Pública da Mariña convocou esta concentración na Praza da Mariña de Burela para proclamar o seu rexeitamento aos anuncios da Consellaría de Sanidade sobre a creación dunha área de xestión integrada que faría desaparecer a capacidade de xestión autónoma do Hospital da Costa de Burela.

Centos de persoas apoiaron esta protesta que coincidiu co Congreso Provincial que o PPdG celebrou na Casa da Cultura de Burela. Ademais dos berros e as pancartas, os manifestantes trasladaban a súa mensaxe entre sons de cacerolas, bucinas e silbatos. Á protesta sobre a sanidade pública xuntouse a que protagonizaron os afectados polas preferentes, ambas no medio de fortes medidas de seguridade.

Moción de apoio

Agora a idea das tres plataformas na defensa da sanidade pública de Lugo é promover iniciativas no conxunto dos concellos da provincia. As Plataformas na Defensa da Sanidade Pública de Monforte, Lugo e A Mariña acordaron levar adiante unha moción de apoio ás súas demandas que no caso das da Mariña e Monforte son coincidentes no mantemento da autonomía de xestión fronte a un decreto de xestión integrada de carácter provincial, así como maior investimento nos servizos sanitarios primarios e especializados en ambas áreas de saúde. No caso de Lugo a iniciativa demandará os servizos de radioterapia, hemodinámica e medicina nuclear para o HULA porque non poden seguir permitindo que un hospital de esas características non conte con estes servizos que aforrarían á poboación desprazamentos innecesarios a outros hospitais da comunidade.