O grupo municipal socialista de Foz instará á Xunta a retroceder na suba dos prezos públicos dos comedores e das matrículas de réxime especial

A Xunta de Galicia veu de anunciar nas primeiras semanas do mes de Marzo un incremento nas taxas polo uso dos comedores escolares limitando o acceso aos mesmos a unha gran parte dos alumnos/as e encarecendo notablemente o uso dos mesmos, con criterios estritamente economicistas.

O mantemento dos servizos públicos susténtanse nos principios de solidariedade e progresividade fiscal. A Xunta de Galicia rechazou recentemente, na tramitación dos presupostos autonómicos do 2013, unha proposta do PSdeG-PSOE referida ao incremento do tipo máximo no tramo autonómico do IRPF para as rendas máis altas na procura de mellorar a progresividade fiscal en Galicia co único argumento de que a efectividade recadatoria da medida proposta polo PSdeG-PSOE sería “irrelevante”.

Na mesma tramitación dos presupostos, o PSdeG-PSOE tamén propuxo a creación dun imposto á banca sobre os depósitos, proposta esta que o PP rexeitou co seu voto en contra no Parlamento de Galicia. Feijóo negouse a apoiar todas estas iniciativas propostas polo PSdeG renunciando así a medidas que afondaban na progresividade fiscal e na idea de que paguen “máis o que máis ten”

Agora o PP por voz do seu Conselleiro de Educación utiliza o argumento de que “pague máis o que máis ten” para estender e endurecer un repago polo uso dos comedores escolares nun novo ataque á clase media traballadora polo uso dun servizo básico educativo. Esta medida suporá, por exemplo, que moitas familias con dous fillos teñan que pagar 198 € polo uso do comedor no vindeiro mes de Abril do ano 2014.

En lugar de incrementar o IRPF para as rendas máis altas ou crear un novo imposto á banca, a Xunta de Galicia prefire subir as taxas polo uso dos comedores escolares, ao tempo que despide a miles de profesores e se gasta máis de 3 millóns de euros ao ano na subvención de colexios vinculados á igrexa e declarados ilegais por segregar ao seu alumnado por razón de sexo, ou manter intactos os 28 millóns de € que se destinan ao ensino da relixión nos colexios.

Así mesmo, a Consellería de Educación tamén ten previsto incrementar a partir do próximo curso, a lo menos nun 30%, os prezos de tódalas matrículas das ensinanzas de réxime especial: Escolas de Idiomas, Conservatorios, Escolas Superiores de Arte Dramático, de Artes Plásticas e Deseño, e Ensinanzas Deportivas Superiores. Unha medida tremendamente inxusta, pois non vai a ter en conta en ningún momento o nivel de renda dos alumnos; ademais de inoportuna, dada a actual situación de crise económica na que moitas das persoas que cursan estes estudos son desempregados/as que pretenden formarse coa finalidade de atopar algunha saída laboral; e que dificultará o acceso da gran maioría dos alumnos a este tipo de ensinanzas.

Polo exposto, e ante o novo ataque do Partido Popular aos cidadáns galegos, o Grupo Municipal Socialista do Concello de Foz presenta para o seu debate e posterior aprobación ante o Pleno da Corporación, a adopción dos seguintes ACORDOS:

– Instar á Consellería de Educación a retroceder e revocar as medidas relativas á suba dos prezos públicos dos comedores escolares e á suba das matrículas das ensinanzas de réxime especial que pretende establecer a Xunta para o vindeiro curso.

– Dar traslado á Consellería de Educación do total rexeitamento do Concello de Foz ao repagamento do servizo de comedor escolar e á suba de entorno a un 30 % nas matrículas das ensinanzas de réxime especial que pretende establecer a Xunta para o vindeiro curso, por ser un novo machadazo ás clases medias traballadoras.