A ANPA As Mercedes manifesta a súa sorpresa ante a falta de unanimidade no acordo do Concello de Lugo sobre a transformación do instituto

Na tarde de onte debatíase no pleno do Concello de Lugo, pola vía da urxencia, a iniciativa que a Comunidade escolar do IES As Mercedes tiña presentado a semana pasada a todos os grupos municipais, e na que o Concello insta á Xunta de Galicia a paralizar a aplicación do DECRETO 49/2013, do 21 de marzo, polo que se crean e se transforman institutos de educación secundaria da Comunidade Autónoma de Galicia para, a continuación, iniciar un debate sobre as novas ofertas de Formación Profesional que o citado Decreto pretende implementar no IES As Mercedes e sobre as demandas de ESO e BAC da zona Sur de Lugo.

En relación ao debate no pleno, e en nome de toda a Comunidade Escolar, queremos agradecer a todos os grupos municipais a oportunidade que nos deron, agradecer ao grupo de Goberno e ao grupo municipal do BNG o acordo adoptado; mais, en relación ao grupo popular, temos que manifestar, antes de nada, a nosa sorpresa polo seu voto negativo e, en segundo lugar, lamentar termos que escoitar na palabra da voceira de Educación do PP as razóns que a Consellería de Educación debería ter comunicado e discutido con esta Comunidade Escolar. A partir dos argumentos expostos e remitidos a cada un dos grupos municipais sobre as necesidades educativas da zona Sur de Lugo e sobre os proxectos e funcionamento do noso Instituto, agardabamos dos nosos representantes no Concello unha unanimidade de voto que, onte constatamos, non puido ser. De todas formas seguimos invitando aos representantes do Grupo Popular a coñecer directamente a oferta educativa e os proxectos do IES As Mercedes, quedando comprometidos, – Jaime Castiñeira e Lourdes Yáñez-, a visitar o Instituto mañá,mércores, a partir das doce da mañá.

Toda esta Comunidade Escolar séntese agraviada pola falta de unanimidade de onte no Pleno do Concello de Lugo, pero queremos agardar que se poida dar no futuro, pois, parécenos innegable que a Zona Sur de Lugo necesita da oferta pública de ESO e BAC que ten hoxe no IES As Mercedes e que non hai ningunha mellora nin ningunha nova oferta de novos ciclos de Formación Profesional que non poidan ter cabida neste Centro dentro das obras de ampliación xa previstas, comprometidas e incluídas nos orzamentos pola Consellería de Educación. E en calquera caso, simplemente se pide abrir ese debate.

No día de hoxe, nunha reunión coas Asociacións de Veciños primeiro (ás 6 da tarde) e nunha reunión das ANPAS despois (ás 7 da tarde), debaterase o camiño a seguir. Pero xa adiantamos que queremos levar esta mesma petición ao Pleno da Deputación de Lugo e ao Pleno do Parlamento, pois consideramos que o dereito de todos e todas a unha Educación Pública de Calidade necesita dunha oferta de escolarización non masificada e que este dereito ten que prevalecer por riba desta política de recortes que practica o Goberno da Xunta de, por un lado, retirar importantes recursos económicos dos servizos públicos para, por outro, entregalos ao negocio privado do ensino.