O BNG invita aos mariñáns a participar na concentración contra as políticas da Troika convocada para mañá en Ribadeo

Ermida denuncia que Europa aproba medidas que afogan ás maiorías sociais e que son alleas á realidade do país como a Política Pesqueira Común que condena a gran parte da flota da comarca a desaparecer

A Mariña, 31 de maio de 2013. O Bloque Nacionalista Galego (BNG) da Mariña, súmase á Xornada Mundial dos Pobos contra a Troika que se celebrará mañá, sábado 1 de xuño, e coa que a través da convocatoria de concentracións nas cidades e vilas preténdese amosar o rexeitamento dos cidadáns a todos os organismos que están ordenando medidas que afogan ás maiorías sociais e responden aos ditados do gran capital especulativo.

Ana Ermida, responsábel comarcal da formación nacionalista na comarca, lembra que “o Bloque sempre denunciou que as políticas da Troika son unha arma letal contra o desenvolvemento dos pobos . O BNG sempre foi contrario a política monetaria europea encanto está ao servizo do capital financeiro agravando así as diverxencias socioeconómicas reais. Este é só un dos moitos motivos polos que os nacionalistas xa nos opuxemos en 1986 á entrada na CEE, denunciamos no 1992 as consecuencias do Tratado de Maastricht e pedimos abertamente, no 2005, o voto en contra do referendo sobre o Tratado para a Constitución Europea. Véndennos Europa como única posibilidade para o progreso e o benestar cando está vendida ao servizo da banca e do grande capital.”

Desde o Bloque Nacionalista Galego da Mariña chaman a participar nesta mobilización europea contra os pobos prevista para mañá, sábado 1 de maio, ás 12:30 horas, na Praza de Abaixo de Ribadeo. “Temos que dar unha resposta galega e popular ao roubo da banca por parte da Unión Europea e o Partido Popular. Cómpre poñer nas mans do pobo e dos gobernos as decisións políticas, hoxe secuestradas polos mercados. Cómpre gañarmos soberanía para poder tomar decisións políticas en función dos intereses e necesidades das maiorías sociais. E cómpre rompermos a dependencia económica e a subordinación política de Galiza para garantir o noso desenvolvemento económico, social e cultural” – insiste a responsábel comarcal.

“As políticas da Troika –conclúe Ermida- teñen unha repercusión directa na comarca. Está obrigando a facer recortes que afecta a todos os eidos pero tamén á sanidade e á pesca. A nova política pesqueira aprobada por Bruxelas suporá un ha importante perda de empregos xa que o único destino cara o que nos conduce é a desaparición de gran parte da flota. A Política Pesqueira Común é unha proba máis de que a política europea está lonxe da realidade; a nov anormativa será un novo golpe para a economía da comarca”.