O Concello de Cervo facilitará e axilizará os trámites en materia catastral

Cervo, 27 de maio de 2013-A Comisión Especial de Contas debateu esta mañá o convenio de colaboración que o goberno local pretende asinar coa Dirección Xeral de Catastro para mellorar, facilitar e axilizar todos os trámites que teñen que realizar os cervenses en materia catastral. Unha comisión á que estaban convocados todos os grupos e á que non asistiron os representantes socialistas.

En concreto, trátase dun convenio a través do cal o Punto de Información Catastral do Concello de Cervo poderá xestionar os expedientes dos cervenses, dende o comezo ata o final do proceso, de forma que toda a documentación relacionada con cada caso e a resolución dos expedientes quedará en mans deste departamento municipal. As principais xestións que se poderán realizar son as de tramitación e aprobación de expedientes de alteración catastral e as transmisións de dominio sobre bens urbanos e rústicos. Ao mesmo tempo tamén se ofrecerá información e asistencia directa ao contribuínte sobre estes asuntos.

Esta capacidade do Concello para realizar os trámites catastrais ao completo será unha grande novidade con respecto ás funcións asignadas ata o de agora, de recollida de solicitudes e demais documentación que presentaban os contribuíntes e posterior traslado á Dirección Xeral de Catastro, que era a única que podía resolver ditos expedientes. Así, dende que entre en vigor o convenio, o Concello poderá recibir, xestionar e resolver un mesmo expediente sen necesidade de que este saia das oficinas municipais.

Deste xeito, os trámites entre o usuario e a administración serán “máis áxiles e máis próximos ao cidadán” tal e como explica a edil de Facenda, Yolanda Pedreira, “eliminando carga burocrática e centralizando as xestións nunha soa administración”. Tamén cabe destacar que esta novidade permitirá adaptar o servizo municipal de Catastro aos soportes e formatos informáticos establecidos pola Dirección Xeral de Catastro utilizando os medios telemáticos para o intercambio de información entre administracións.

Hai que especificar que a adquisición de novas competencias por parte do Punto de Información Catastral do Concello só implica a tramitación completa dos expedientes a través da fórmula da encomenda de xestión, pero en ningún caso a asunción da titularidade das competencias, que seguen sendo da Dirección Xeral de Catastro.

Esta iniciativa atópase na fase inicial de instauración, e o que se fai nun primeiro momento é solicitar á Dirección Xeral de Catastro, dependente do Ministerio de Economía e Facenda, a subscrición do convenio de colaboración entre dita administración e o Concello de Cervo.

Unha acción que vai na liña de “achegar a administración ao cidadán ofrecendo os trámites e servizos que tiñan máis lonxe”, engade Pedreira, como é o caso tamén das xestións necesarias para cambiar de domicilio no permiso de condución ou de circulación, que ata o de agora tiña que facerse na Dirección Provincial de Tráfico en Lugo e que dende hai uns días pódese realizar nas oficinas municipais.