O PP de Viveiro busca responsabilidades ante a falta de cobro dos traballadores de Aparcamientos A Mariña

Os populares viveirenses denuncian que “unha vez máis asistimos a situacións que non tiñan por qué suceder e que son perfectamente previsibles”.

“O embargo dos bens municipais pola SGAE, non é un caso illado e non debe quedar como unha mera anécdota pois, Viveiro foi e é, o único concello da comarca e da Provincia que foi embargado non só por esta sociedade senón por outros moitos provedores, o que denota o desvarío e a apatía que este alcalde e os seus gobernos aportaron á institución máis representativa do municipio. Embargos que non foron máis numerosos precisamente polo Plan de Pagos a Provedores posto en marcha polo actual goberno da nación”, segundo apunta o concelleiro popular, César Aja.

Os cidadáns de Viveiro e o PP ven con absoluta sorpresa como tres institucións como son a Xudicial, a SGAE e o Concello, “se xustifican mutuamente, sen que ninguén adopte as medidas oportunas para dar solución a un grupo de traballadores que levan dende xaneiro sen cobrar o seu salario, sendo o motivo única e exclusivamente o decidir quén ten a responsabilidade e a obrigación de velar polos intereses dos traballadores”.

Aja explica que “non cabe dúbida de que estes traballadores pertencen a unha empresa municipal, é dicir ao Concello. E, polo tanto, é o xefe de persoal quen debe velar polo benestar dos seus empregados. Nembargantes, non coñecemos por parte do alcalde ningunha acción encamiñada en dar solución a este problema”.

“Ó igual que se realiza para outros colectivos, nada impide que se lle adianten certas cantidades ós empregados municipais e así evitar tensións económicas a familias que teñen todo o dereito de cobrar polo seu traballo, dado que estas cantidades, agora inmobilizadas, son recuperables para o Concello unha vez liberalizadas”, segundo os populares.

Desde o PP agardan que “se dea solución á utilización dos fondos de Aparcamientos A Mariña ó obxecto de poder satisfacer a débeda que a empresa ten cos seus traballadores ou en caso contrario se habilite a correspondente partida por parte do Concello para adiantar ós traballadores as cantidades adebedadas”.