O vicepresidente da Deputación chama a promover a igualdade de oportunidades da flota da comarca da Mariña no marco comunitario

A Mariña, 24 de maio de 2013. O vicepresidente da Deputación Provincial de Lugo, Antonio Veiga, clausurou, esta tarde, as xornadas técnicas que se celebraron no marco a décimo quinta edición do certame Expomar, no que están a participar 300 empresas dos sectores pesqueiro, conserveiro e náutico. Esta cita anual consolida á comarca da Mariña como capital destes sectores para toda Galiza, o norte do Estado e o norte de Portugal e constitúe unha boa oportunidade para facer negocios para as empresas e profesionais que participan nela.

Durante a súa intervención, Veiga fixo un chamamento a todas as administracións públicas para apostar polos sectores pesqueiro e conserveiro e impulsalos como motores de estímulo económico. “A pesca no noso país ten potencial suficiente para continuar crecendo, abrir novas vías de negocio e crear postos de traballo. Só na comarca da Mariña o 8 por cento da poboación ocupada pertence a estes sectores e cada emprego que se crea no mar, crea outros tres na industria de transformación en terra. Os poderes públicos competentes deberan colaborar na elaboración dun plan de impulso económico que respecte o desenvolvemento sostíbel dos recursos do mar e teña, entre outros obxectivos, a busca de valor engadido”.

O sector pesqueiro está a pasar un momento que o vicepresidente da Deputación tildou de “dramático” e achaca á dependencia das cotas que determina Europa e que “supoñen unha esmola para a flota galega ao non ser acordes coa dispoñibilidade real de recursos. A flota da Mariña ten prohibida a pesca de cabala cando esta é unha das especies máis abundante nas nosas costas. E temos que recordar o asunto do ‘box irlandés’, zona que permanece vedada aos pescadores galegos desde 1.986 cando o Estado entrou na Unión Europea”.

Ademais de buscar solucións ao sistema de cotas restritivo, Veiga insistiu na necesidade de apoiar a promoción de marcas propias da comarca, como a Merluza do Pincho de Celeiro ou o Bonito de Burela, de fechar o ciclo produtivo apoiando as empresas de transformación, sen esquecer a relevancia e o papel imprescindíbel das empresas exportadoras.

“Os sectores pesqueiro, conserveiro e náutico deben afrontar importantes retos nun espazo de tempo moi curto para garantir o seu futuro; un futuro que debe xirar entorno a tres grandes eixos: promover a igualdade de oportunidades no marco comunitario, potenciar a transformación dos produtos do mar e mellorar a conservación do peixe en fresco, o que require investir en I+D+i” –concluíu o vicepresidente da Deputación Provincial.