A Área de Cultura da Deputación Provincial promociona a provincia a través de baixo pratos

Lugo, 9 de xullo de 2013. O delegado de Cultura e Turismo da Deputación de Lugo, o nacionalista Mario Outeiro, presentou este martes 9 de xullo, xunto ao presidente da Asociación Provincial de Empresarios da Hostalería de Lugo, Cheché Real, a campaña promocional de achegamento da nosa cultura e dos lugares turísticos de referencia aos turistas que se achegan á nosa provincia a través dos baixo pratos con información turística que se editan para seren distribuídos polos locais hostaleiros lucenses.

Tal e como explicou Mario Outeiro, “a campaña consiste no reparto de 400.000 baixo pratos, ao longo destes meses, por toda a provincia de Lugo, entre os establecementos de hostalaría onde, nesta ocasión, se promocionarán as rutas fluviais que pon en marcha a Área de Turismo da Deputación: a dos Robles e Belesar, no río Miño, e a de Doade, no Sil, así como os museos pertencentes á Rede Museística, entre outros puntos de interese cultural e turístico”.

Mario Outeiro destacou que “os baixo pratos proporcionan información básica moi útil para todos os turistas, de feito son moitos os que o levan para facer uso del e é moi común, tal e como se ten constatado en moitas ocasións, que o primeiro que fan os turistas antes de que os sirvan é apartar o prato para mirar no mapa onde están, cara onde van e que é o que van facer”.

Pola súa banda, o presidente da Asociación Provincial de Empresarios da Hostalería de Lugo, Cheché Real, sinalou que é unha iniciativa que se pon en marcha por sexto ano consecutivo xa que ten moi boa acollida tanto por parte dos hostaleiros, pola súa funcionalidade e servizo, coma polos turistas, que atopan nel a información básica para a súa viaxe e os seus días en Lugo. Nesta liña, deu o seu agradecemento á Área de Turismo da Deputación por axudar a pór en marcha iniciativas deste tipo, que contribúen a mellorar os índices turísticos en Lugo.