Entrega de diplomas ós asistentes ó obradoiro de atención a persoas con alzheimer en Burela

Burela, 3 de xullo de 2013. A directora xeral de Formación da Xunta, Ana Díaz, e o alcalde, José Mª González Barcia, entregaron este mediodía os diplomas aos 15 alumnos que participaron no obradoiro de emprego de atención a persoas con alzheimer, que durante 6 meses se levou adiante no centro de formación ocupacional do Concello de Burela.
O rexedor manifestou que “para nós é unha satisfacción poder outorgar estes diplomas porque a estas quince persoas lles permite ter unha titulación perfectamente homologada e unha certificación de profesionalidade”. González Barcia entende que “no que os Concellos temos que colaborar, na medida das nosas posibilidades, é de forma activa coas persoas que están en situación de desemprego”.

O alcalde valora de xeito moi positivo “as subvencións que a Xunta nos da ano tras ano para poder realizar actividades de formación con desempregados. Este obradoiro contou cunha partida aproximada de 140.000 euros, pero hai que lembrar que os catro cursos que estamos a poñer en marcha estes días suman un total de preto de 300.000 euros, que se invisten directamente desde a Xunta para mellorar a formación dos desempregados de Burela”.
O equipo de goberno continuará nesta liña, “seguiremos apostando pola formación dos desempregados porque cremos que é un bo vehículo para buscarlle saída no mundo laboral e conxugamos esta actuación coa orientación laboral. E nese sentido tamén poñemos a disposición de todas as persoas que se encontran en situación de paro o noso servizo de información de emprego para orientalos e que poidan atopar saída a unha situación que todos vemos como complicada, pero que require tamén da aposta de todos, institucións incluídas e aquí o Concello participa de xeito activo, para atopar saída a maior parte das persoas que se atopan desempregadas”.

Tamén asistiron ao desenvolvido este mediodía os concelleiros de Servizos Sociais e Emprego, Diana Durán e José Casas.