Femme fatale trouxo o cabaret ós xardíns da Deputación

Lugo, 11 de xullo de 2013. O segundo dos xoves de Cultura Aberta nos Xardíns da Deputación estivo protagonizado pola compañía Femme Fatale, quen presentou o seu espectáculo Master Class Cabaret, a versión de sala do espectáculo Unha cadeira para mover o mundo na que expresan, de xeito didáctico e desenfadado, a súa propia versión do cabaré. Este ano, todos os xoves de Cultura Aberta están introducidos polos regueifeiros da asociación Oral de Galiza.

Os xoves de Cultura Aberta nos Xardíns da Deputación de Lugo convertéronse, ao paso dos anos, na alternativa estival para o entretemento da poboación lucense nesta época, ofertando todo tipo de alternativas culturais, desde concertos a monólogos, pasando por espectáculos como o desta noite vinculados ao mundo do baile e o espectáculo de cabaré.

Pola súa banda, The Teta’s Van trouxo consigo a revolución en feminino o xoves pasado. Este grupo, formado por rapazas, na súa maioría, é especialista en facer versións e o seu obxectivo é o de divertir transmitindo, reivindicando e loitando contra as inxustizas a través da lingua galega.

Nesta edición os Xoves van ser en clave feminina, e a programación vai contar cunha mostra do mellor do noso panorama artístico actual da man de mulleres grandes e bravas. Completan o programa o espectáculo de hoxe Master Class Cabaret, de Femme Fatale; a poesía musicada de Uxía, cantándolle a Manuel María; a enerxía de Aid, a forza de Sés, os ritmos brasileiros de Jotinho’s e a homenaxe contemporánea de Najla Shami a Rosalía.

Alumnos e profesores da Tradescola son os encargados de amenizar as entradas ás actuacións dalgúns Mércores Miúdos e Xoves de Cultura Aberta, nunha aposta firme polo traballo que realiza este colectivo a prol da música e da cultura galega.