O Reina do Carme acolleu a presentación da campaña sobre a promoción das artes respectuosas co medio ambiente para a pesca do bonito

Burela, 1 de xullo de 2013. O alcalde, José Mª González Barcia, participou esta tarde no barco-museo boniteiro Reina do Carme na presentación da campaña que a Xunta de Galicia organiza dende hai uns anos para promocionar o bonito pescado polos barcos bureleses con artes que son respectuosas co medio ambiente. Ata Burela viaxaron o secretario xeral de Pesca da Xunta, Juan Maneiro, e a Delegada Territorial da Xunta en Lugo, Raquel Arias.

Na opinión do alcalde José María González Barcia “a realización desta campaña é fundamental para o bonito e para os boniteiros, xa que intenta favorecer o consumo do produto fresco, en contra do que se viña facendo hai anos”.

O rexedor lembrou que “esta campaña soamente houbo tres anos en onde non se levou a cabo e foi coincidindo coa etapa do goberno bipartito da Xunta de Galicia”, e subliñou que “esta presentación se fixo en Burela debido ao que o pobo representa en canto á costeira do bonito. Nos anos 40 e 50 Burela comezou a medrar con empuxe e forza grazas precisamente aos ingresos derivados da costeira do bonito. Si o porto de Burela hoxe é o que é en boa medida é debido aos ingresos que ten traído consigo a costeira do bonito, aínda que o peso específico na actualidade sexa bastante inferior ao que tiña hai 25 ou 30 anos”.

González Barcia afirmou que “para nós é unha satisfacción que a Xunta de Galicia se acordase unha vez máis de Burela para a presentación desta campaña que, como non podía ser doutro xeito, se realiza nun auténtico emblema do que é a pesca do bonito con artes tradicionais: o barco-museo Reina do Carme, que recolle na súa neveira unha amplísima exposición na que se contrapoñen as artes depredadoras que non respectan o medio ambiente coas artes de pesca que pola contra si son respectuosas co medio ambiente e coa pervivencia das especies”. Polo tanto, “ademais do que significa o acto en si de por en marcha esta campaña, tamén é unha homenaxe por parte da Xunta e do propio Concello de Burela ao que ten dado de si o bonito representado neste boniteiro Reina do Carme”.