O BNG de Foz reivindica apoios ao sector primario na XX Festa do Chicharro Lañado, acto preparatorio ó Día da Patria

Foz, 20 de xullo de 2013. O BNG de Foz celebrou, na tarde deste sábado 20 de xullo, a XX Festa do Chicharro Lañado, cita gastronómica pero á vez reivindicativa dos sectores productivos de Galiza, que se organiza dentro do conxunto de actos preparatorios que están a desenvolver os nacionalistas no marco do Día da Patria e cos que pretenden esixir máis soberanía para Galiza. Paralelamente desenvolveuse unha exhibición do xogo da billarda co Aberto puntuábel para o Campionato Nacional deste deporte tradicional galego.

O portavoz nacionalista en Foz, Xan Carlos Basanta, que asistiu ao evento, explicou que “o feito de que esta xornada coincida cun momento de fonda crise económica que está a provocar graves consecuencias no sector primario, nomeadamente no agro e na pesca, dálle unha especial significación por tratarse tamén dunha xornada reivindicativa en apoio destes dous sectores produtivos centrais da nosa economía que so poden saír para diante se Galiza é máis soberana e pode decidir por si mesma e non que lle veña imposto polo Estado ou Europa, como sucede este mes co naval”.

O Bloque Nacionalista Galego vincula á falta de soberanía os problemas de moitos sectores produtivos galegos como o naval, o pesqueiro, o agrogandeiro, ou o pequeno comercio.

“Desde o BNG incidimos na necesidade de mobilización social porque a sociedade non pode ficar de brazos cruzados mentres toman medidas que agravan aínda máis a recesión e destrúen aínda moitos máis postos de traballo.O BNG quere chamar ás mariñás e aos mariñáns á mobilización e que se poña en pé na defensa dos seus dereitos o 25 de xullo, e que a xente botada á rúa sexa un dique de contención contra o vendaval centralista, antisocial e antidemocrático que ten levantado o PP contra Galiza”, concluíu o portavoz nacionalista.