O grupo popular amosa a súa satisfacción pola declaración institucional en favor do naval galego aprobada no Parlamento

Santiago, 10 de xullo de 2013.- O portavoz do Grupo Popular, Pedro Puy, amosou este mércores 10 de xullo a súa satisfacción pola declaración institucional aprobada de xeito unánime na Deputación Permanente en defensa do sector naval galego, “nun momento relevante xa que mañá terá lugar en Bruxelas a reunión entre o comisario da Competencia, Joaquín Almunia, o ministro de Industria e os presidentes das comunidades de Galicia, Asturias e o País Vasco”.

Pedro Puy fixo un repaso desde a aplicación do réxime fiscal do tax lease no ano 2002 ata a actualidade, con referencias á apertura de expedientes tanto a Francia como a España e a autorización de novos beneficios fiscais a España por parte da Unión Europea.

ARGUMENTOS XURÍDICOS SÓLIDOS

“A devolución das axudas directas concedidas a través do tax lease desde o ano 2005 sería un drama e suporá a práctica desaparición do sector naval galego”, sinalou o portavoz popular. Neste sentido, apuntou que a devolución de máis de 2.800 millóns de euros por parte do sector naval español “ten un claro beneficiario: os competidores dos estaleiros galegos”.

“A posición galega e española ten argumentos xurídicos sólidos”, afirmou Puy. En concreto, citou o principio de seguridade xurídica, “respaldado por unha carta da propia comisaria Neelie Kroes de 2009 que avalaba o tax lease ao non atopar indicios de discriminación”, así como no propio Estado de Dereito de Europa, como mesmo se recolle na xurisprudencia do Tribunal Constitucional de España e Alemaña. Pero tamén fixo referencia ao principio de proporcionalidade, “xa que non se pode impoñer unha sanción a un sector que supón a perda de 87.000 postos de traballo a nivel nacional”.

Pedro Puy salientou que a Xunta de Galicia leva investidos máis de 80 millóns de euros no sector naval, ao tempo que destacou actuacións concretas para reflotar PYMAR, apoiar a formación dos traballadores do sector naval, as axudas para a subsistencia de Vulcano ou Factoría Naval de Marín e as negociacións levadas a cabo en diversos ámbitos para a consecución de carga de traballo. “Ata o punto de que os propios socialistas acusaron ao Presidente da Xunta de actual de comercial de Navantia”, dixo.