Val esixirá á Xunta o mantemento dos planteles das escolas infantís de Foz e do Valadouro

O Deputado socialista José Ramón Val presentará unha proposición non de Lei no Parlamento galego para esixir á Xunta que manteña, como mínimo, a mesma plantilla coa que contan na actualidade as escolas infantís dos concellos do Valadouro e Foz. O tamén secretario comarcal do PSOE na Mariña formulará esta iniciativa parlamentaria ante a decisión do Goberno de Feijóo de privar a estes municipios de senllas monitoras encargadas de atender ós nenos de 0 a 2 anos para trasladalas ó centro infantil de Alfoz.

Trátase dun “novo recorte nos servizos sociais” que Feijóo pretende aplicar na Mariña “pola porta de atrás”, pois trátase, “como fai sempre o PP, dunha decisión unilateral e sen dar ningún tipo de información ós respectivos Concellos, a pesar de que son estes os que asumen os custes de mantemento, limpeza, vixiancia e seguridade, e a pesar de que teñen un convenio asinado coa Xunta”, subliñou Val. Por todo isto, o socialista levará tamén á Cámara autonómica unha batería de preguntas para saber se a Xunta “pensa que redundindo a plantilla se pode manter a mesma calidade de atención ós nenos do Valadouro e Foz”, ademais de coñecer “cales son os seus plans reais para a educación na Mariña”.

José Ramón Val cre que a Xunta debe “dar explicacións canto antes sobre cales son as súas verdadeiras intencións en materia de servizos sociais nesta comarca. Dende logo, podémonos esperar calquera cousa, despois de que o Presidente da Xunta decidise unha mañá que deixaba de pagar o Servizo de Axuda do Fogar, desentendéndose de 3.000 lucenses e poñendo en perigo 2.000 empregos. Dediciu moi comodamente que o pagase outro”.

Balseiro, “unha balsa de aceite”

Val criticou por outra banda que o secretario provincial do PP, José Manuel Balseiro, se estea a comportar “como unha balsa de aceite ante os continuos abusos perpetrados nesta comarca polo PP”. “Cala ante a supresión dunha praza de médico en Cervo, a pesar do profundo e xeralizado rexeitamento que esta medida está provocando entre os seus veciños”, asegurou Val, quen instou a Balseiro a deixar de permitirlle a Feijóo “o dereito de pernada”, pois “os mariñanos non merecen un representante político que antepoña por riba de todo os intereses de partido”.