Lugo, 19 de setembro de 2013.- A delegada territorial da Xunta en Lugo, Raquel Arias, destacou hoxe a aposta que realiza Turismo de Galicia “por dinamizar o turismo no eido rural e a promoción da nosa gastronomía” a través do programa Outono Gastronómico, que inicia este mes a súa sétima edición.
Arias presentou hoxe esta iniciativa na provincia de Lugo, na que, segundo indicou, “crece o número de establecementos que participan neste programa, no que este ano se inclúen 29 negocios deste eido, dous máis que no ano 2012”.
Arias, que estivo acompañada pola xefa do servizo de Turismo, Paloma Vázquez, significou que con este programa, o organismo dependente da Xunta de Galicia impulsa “unha oferta complementaria neste segmento do turismo rural”. Así mesmo, a delegada engadiu que se favorece a desestacionalización neste período no que a natureza de Galicia permite desfrutar de estadías moi singulares enmarcadas nas contornas rurais da comunidade.
A representante do Executivo galego na provincia considerou que, a través do Outono Gastronómico achégase aos interesados unha opción que facilita “un xeito de coñecer a esencia da nosa comunidade a través da súa comida e do entorno rural”. O programa estará vixente durante tódalas fins de semana dende o presente mes ata o 15 de decembro.
Na provincia de Lugo, os establecementos que se incluíron nos Outonos Gastronómicos son: Casa de Maside, Casa do Canto da Terra, Rectoral de Castillón e Casa dos Muros (Pantón), O Almacén e Casa do Mudo (Cervo), Casa Grande de Anllo e Casa Condiño (Cospeito), Casa Caxigueiro e Rectoral de Goián (Sarria), Casa Blanco e A Parada das Bestas (Palas de Rei), Casa Grande de Rosende e Rectoral de Anllo (Sober), El Rincón de Anita (Foz), Finca O Bizarro (Trabada), Casa Cazoleiro (Meira), Longarela Casa Rural (Castroverde), Casa Grande da Fervenza (O Corgo), Casa O Crego (Cervantes), Casa de Láncara (Láncara), Pazo de Ludeiro (Monterroso), A Lareira (As Nogais), A Casa da Cabaza (O Incio), Casa do Romualdo (Taboada), Casa Vilamor (O Saviñao), Casa Caselo (Folgoso do Courel), Pazo do Piñeiro (Chantada) e Casa Grande da Ferrería de Rugando (Quiroga).
Axudas para melloras turísticas
Arias fixo énfase tamén no “pulo” do Executivo galego, a través da Turismo de Galicia, para a modernización do sector do turismo rural. Para o caso lucense, a delegada destacou que nesta provincia concéntranse este ano “as maiores achegas para mellora de infraestruturas turísticas”. De feito, dentro desta liña de axudas, Lugo recibiu preto de 260.000 euros (258.753,38 euros), cos que se beneficia a 19 establecementos de toda a provincia.
A provincia de Lugo, engadiu Arias, superou en case 5 puntos á media das outras provincias, chegando a máis do 28 % do orzamento total dedicado en toda a comunidade galega.
Así mesmo, Arias recordou que ademais da liña de infraestruturas turísticas este ano dispuxéronse tamén varias liñas de axuda destinadas a fomentar a mellora do produto e das infraestruturas turísticas galegas a través de subvencións á certificación da Q de calidade, comercialización do destino Galicia a través das axencias de viaxe e equipamento para as empresas de servizos turísticos complementarios. Por outra banda, tamén se habilitou un programa de axudas aos concellos para o desenvolvemento das festas declaradas de interese turístico galego, que aínda está aberto o prazo para a súa solicitude ata o 30 de outubro. De feito, ata o momento, na provincia de Lugo solicitouse axuda para 13 festas das 24 declaradas de interese turístico galego.
Novas posibilidades na presente edición do ‘Outono Gastronómico’
Arias recordou que este ano os Outono Gastronómico incorpora como novidade a posibilidade de regalar unha experiencia gastronómica e rural en Galicia a través do Bono Agasallo Outono Gastronómico. A través desta iniciativa, os usuarios teñen a posibilidade de celebrar un acontecemento ou ocasión regalando aos seus amigos ou familiares un bono para gozar dun Paquete do Outono Gastronómico.
Deste xeito, o convidado terá a posibilidade de escoller calquera das casas de turismo rural da guía editada con motivo desta promoción e decidir a estadía que prefira dentro dos tres meses de duración da campaña. Deste xeito, a persoa que regala o bono pode activalo chamando ao teléfono de Turismo de Galicia ou a través do correo cir.turgalicia@xunta.es para poder regalar esta experiencia.
Outras ofertas do programa
Na edición 2013, o Outono Gastronómico conta no total da comunidade coa participación de 117 establecementos rurais. As casas de turismo rural de Galicia participantes neste programa ofrecen as seguintes posibilidades:
1. Un Menú Outono Gastronómico. Pode escollerse entre dúas opcións en cada casa e cada unha delas consta de entrante, primeiro prato, segundo prato e sobremesa, café ou infusión, viños con Denominación de Orixe galega e outras bebidas. O prezo é de 30 euros por persoa.
2. Un Paquete Outono Gastronómico que permite degustar o Menú Outono Gastronómico e pasar a noite na casa de Turismo Rural elixida, incluíndo os almorzos do día seguinte –pódese escoller a noite do venres ou a do sábado-. O prezo é de 110 euros (2 persoas/cuarto dobre) ou de 70 euros (1 persoa/cuarto individual).
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
A programación arrancará de 13:00 a 15:00 horas cos pinchos de benvida e unha sesión vermú a cargo do DJ Peabody. A continuación, de 15:00 a 17:00 horas, terá lugar a comida na Finca San Antonio, cun menú composto por salpicón de rape e langostinos, codillo con patacas, pan, postre, café, chupito e bebida incluída. Os tickets teñen un prezo de 40 euros e poden adquirirse en O Rincón, Confitería Alianza, Comercial Anjor e Perruquería Oriola; os menores de 5 anos asistirán de balde e os de 6 a 10 anos contan cun desconto do 50 %. Xa a partires das 18.30 horas haberá sesión de música con Toxo Guayaba.
