A Deputación ofrece máis de 500 horas de formación gratuíta ós máis de 900 empregados públicos da provincia

A Deputación de Lugo vén de convocar unha nova programación de cursos, abertos á participación de todos os empregados públicos da provincia, que ofrece máis de 500 horas de formación en diferentes áreas, pensada para ofrecerlles os instrumentos necesarios para a modernización da administración pública.

Deste xeito, a programación formativa disposta para o derradeiro cuatrimestre do 2013 persegue o dobre obxectivo de mellorar a organización das Corporacións Locais ó tempo que se melloran as competencias dos empregados públicos. Tendo en conta que a formación é unha ferramenta de cambio, imprescindible para reformar os procesos de traballo, o plan agrupado posto en marcha pola institución provincial está encamiñado á transformación dunha Administración excesivamente burocratizada e lenta nunha Administración transparente, moito máis cercana ó cidadán. A institución provincial leva tempo traballando en prol da e-administración, coa intención de mellorar as relacións entre o organismo e os veciños da provincia, xa que esta administración electrónica aumenta a transparencia e axiliza a comunicación cos cidadáns.

Para a súa elaboración tivéronse en conta as necesidades formativas dos destinatarios, mediante a cumprimentación de cuestionarios por parte tanto de organizacións sindicais coma responsables de formación das diferentes Administracións e cos propios traballadores públicos participantes nas anteriores convocatorias.

O Plan Agrupado da Deputación de Lugo para o ano 2013 está dirixido a todos os empregados públicos da institución provincial e dos Concellos da provincia. Coma en anteriores convocatorias, parte desta formación é moi específica e deseñada para determinados colectivos, coma membros das forzas e corpos de seguridade e de servizos de emerxencias, coma policías e bombeiros.

20 accións formativas
Consta de 20 accións formativas -11 presenciais e 9 online-, que ofrecen un total de 553 horas lectivas. Estas distribúense fundamentalmente en áreas de coñecemento coma as novas tecnoloxías e a súa imprantación no marco da Administración; os temas económico-orzamentarios, xurídicos e de procedemento administrativo; o medio ambiente, urbanismo ou desenvolvemento local e de normativa da Unión Europa.

Os cursos dispoñibles son os seguintes:
– Novidades na Lei de Contratos do Sector Público
– Aplicación práctica do procedemento administrativo nas administracións públicas
– Incidencia da reforma laboral nas Administracións Públicas
– Ferramentas web 2.0. Redes sociais e profesionais. Nivel básico
– Estabilidade orzamentaria no ámbito local
– Xestión de fondos europeos nas Administración Locais
– Administración e xestión de Recursos Humanos das entidades locais na normativa vixente
– Procedemento administrativo común, responsabilidade patrimonial, revisión de oficio e potestade disciplinaria
– Aspectos prácticos sobre procesos informáticos no ámbito da xestión tributaria e a recadación nas entidades locais
– Control do uso do tacógrafo nas vías urbanas para policías locais
– Desbloqueo en montacargas, elevadores e ascensores
– Técnicas para a intervención con familias en risco social
– A creatividade e a innovación como competencias de futuro
– Iniciación á utilización da Intranet no ámbito local
– O sistema institucional, o ordenamento xurídico e a estrutura institucional da Unión Europea
– Microsoft Excel. Nivel avanzado
– Web 2.0: utilización dos recurso de Internet. Nivel avanzado
– Xestión de equipos: mando, liderazgo e motivación
– Agente dinamizador do medio rural
– Formación de xestores enerxéticos municipais

Solicitudes antes do 18 de setembro
Todos os interesados en acceder a estas accións formativas dispoñen de toda a información necesaria na páxina web www.deputacionlugo.org. Nesta páxina tamén poderán atopar e descargar o modelo de solicitude que deberán presentar, debidamente cuberto, no Rexistro Xeral da entidade, situado no edificio do Pazo provincial; por correo electrónico, no enderezo formacion@deputacionlugo.org; mediante fax dirixido ó número 982 260 169; por correo ordinario, enviando as instancias ó enderezo Rúa San Marcos, 8- 27001 Lugo; ou nos demais lugares sinalados no artigo 38.4 da Lei 30/19892, de 26 de novembro, de Réxime Xurídico das Administracións Públicas e do Procedemento Administrativo Común. O prazo de presentación de solicitudes remata o 18 de setembro.