O BNG solicita da corporación a homenaxe aos máis de 40 focegos vítimas do Franquismo

Foz, 6 de Setembro de 2013. O Bloque Nacionalista Galego anunciou que presentará una moción no próximo pleno solicitando a condena unánime de toda a Corporación á represión franquista no Concello de Foz así como o apoio a todas as vítimas da mesma na localidade apostando pola súa rehabilitación social e institucional á par que instamos ao presidente do Partido Popular de Galiza, Alberto Núñez Feijóo, e ao presidente do Partido Popular de Lugo, Xosé Manuel Barreiro, a que procedan a destituír de todos os seus cargos públicos, é dicir, como alcalde de Baralla e deputado provincial, a Manuel González Capón.

O Portavoz do BNG en Foz, Xoán Carlos González Basanta lembrou que “a Corporación municipal de Foz segue a ter unha débeda cos preto de 40 veciños do noso Concello que sufriron a represión e o terror por defender o proxecto de reforma social e nacional que representou a II República. Aquel Foz republicano, obreiro, vermello e soberanista a día de hoxe só recibiu a homenaxe da sociedade sen que por parte das institucións se procedese a facer ningún tipo de xesto para rehabilitar aos homes e as mulleres que fixeron posíbel aquel período. É hora de rematar co desprezo e neste sentido agardamos que o Grupo de Goberno proceda a darlle a unha rúa o nome de “Rúa da II República”, acordo unánime da corporación de fai preto de 10 anos e que durme no caixón da Alcaldía pero tamén que se lle dea o debido recoñecemento social ás persoas que no PSOE, en Unión Republicana, en Izquierda Republicana, na UXT, na CNT, pero tamén na sociedade de Socorros Mutuos, na Sociedade Cultural e Deportiva Focense ou na Confraría apostaron por un Foz mellor e por unha sociedade de iguais”.

Xoán Carlos González Basanta indicou que “imos a lembrar a máis de 40 veciños e veciñas de Foz, homes e mulleres de diferentes clases sociais, posicións ideolóxicas e que foron sometidas a diversas tipoloxías represivas. Na homenaxe van estar presentes Fuente, o Bernizador, o Benigno da Calzona, o Regueiro, o Francisco do Taller, o Máximo Causo, o Pepe Mel, O Xuez, o Pepe Paz, o Petrulo, o Ramón do Zapateiro, o Ramiro de Poza, o Antonio de Eusebia, o U Leonardo Uría,o Ramón do Montañés, o Gómez, os carteiros de todas as parroquias expedientados coa perda do emprego após o Alzamento, os mestres apartados do ensino, as traballadoras da conserva que conseguiron facer efectiva despois de dous meses de folga en 1933 a xornada das 8 horas, os que participaron da guerrilla e se exiliaron e aqueles que resistiron como Ramón Couto ou Amalito e atoparon folgos para tirar foguetes o día en que Stalingrado sería liberado polo Exercito Vermello. Son 40 os nomes, homes e mulleres que imos lembrar, a listaxe dos nomes da dignidade focega que padeceron represión por defenderen a causa da democracia e das liberdades republicanas, con elas acaba o golpe de estado de 1936, a feroz represión que o acompaña, a guerra civil que provoca e a ditadura que se instaura como consecuencia da vitoria franquista. É hora de mudar a historia porque cando entran en conflito as memorias dos vencidos e as dos vencedores, por definición sempre trunfan as destes últimos. Por iso agardamos que o próximo pleno da Corporación remate por converterse un acto de xustiza e de dignidade, honrando a memoria daqueles e daquelas que padeceron o terror franquista por defenderen unha sociedade xusta, igualitaria e democrática. Un acto de xustiza e dignidade ao que agardamos se sumen todas as forzas políticas posto que hora de pasar páxina co franquismo pero ao que tamén convidamos a todos os veciños e veciñas de Foz a que acudan ao Pleno na súa honra”.