Burela contará en breve cun grupo de prevención e seguridade cidadá grazas a unha subvención da Xunta

Burela, 5 de outubro de 2013. Burela contará en breve cun Grupo de Prevención e Seguridade Cidadá que estará formado por catro persoas, segundo anunciaba este sábado o alcalde, José Mª González Barcia.

O rexedor explicou que “nos próximos días o Concello de Burela vai iniciar o procedemento de contratación de 4 persoas para crear un Grupo de Prevención e Seguridade Cidadá, que vai ter unhas funcións similares ás que tiñan os antigos Grumir. Esta vaise crear grazas a unha subvención aportada ao cen por cen pola Xunta de Galicia e que suporá un importe próximo aos 39.000 euros”.

González Barcia sinalou que “o período de traballo vai ser de 6 meses desde a firma do contrato laboral. Nestes momentos estamos deseñando os horarios e a distribución destas 4 persoas e confiamos en que empecen a traballar dentro de aproximadamente 15 días”.

O alcalde burelés dixo que “desde o Concello recoñecemos e valoramos positivamente o esforzo que está facendo a Xunta en materia de emprego, especialmente co Concello de Burela. Nestes momentos temos 5 cursos en marcha máis o obradoiro compartido con Cervo e Xove, que empezará en breve. Se a todo isto sumamos as cantidades que a Xunta nos concedeu para a contratación de socorristas, dun orientador laboral e destas catro persoas a verdade é que estamos falando de cantidades importantes que roldan o medio millón de euros”.