Cervo destina 2.500 euros á compra dun novo motor para a zódiac de asistencia do C.D. San Ciprián

Cervo, 3 de outubro de 2013-O Concello de Cervo vén de colaborar coa sección de piragüismo do Club Deportivo San Ciprián coa compra dun novo motor para a zódiac de asistencia da que dispoñen permanentemente no encoro de Río Covo. Unha acción á que a administración local destinou 2.500 euros despois de que o motor da embarcación tivera que ser substituído.

Con este investimento, a delegación de Deportes quere seguir apoiando ao Club Deportivo San Ciprián na súa labor de promoción da práctica do piragüismo. Neste sentido, cabe destacar que a zódiac de asistencia é un elemento de seguridade imprescindible no desenvolvemento deste deporte destinado á asistencia dos padexeiros, especialmente dos menores de idade.

A zódiac ten o obxectivo de garantir a práctica desta disciplina coa máxima seguridade. “É importante fomentar o deporte entre a poboación, pero é unha máxima prioridade velar pola seguridade de todas as persoas que o practican, tendo en conta ademais que alí adestran moitos nenos e nenas” explica o edil de Deportes, Luis Guillén, que se achegou ata as instalacións do club xunto ao alcalde de Cervo, Alfonso Villares, o presidente do Club Deportivo San Ciprián, César Rivas, e o adestrador e delegado da sección de piragüismo, Javier García Garza.