Media verdade: mentira enteira

Na Mariña luguesa andamos ás voltas cunha polémica artificial creada por un partido político ao que lle interesa máis crear conflitos que achantar coas súas propias responsabilidades. Trátase, de novo, de crear confusión. De estar no goberno pero non gobernar.

A realidade é que, fóra da controversia interesada, no asunto do Servizo de Axuda no Fogar sobran os argumentos técnicos. É importante ter en conta os razoamentos do Ditame núm. 3/12 do Consello Consultivo de Galicia, un informe xurídico no que este ente colexiado se pronuncia sobre o Decreto 99/12 de servizos sociais aprobado polo Partido Popular. O Consello Consultivo é un organismo de obrigada consulta nos supostos de regulamentos que se diten en execución das leis. Este órgano independente efectúa na súa argumentación dúas “tachas de legalidade” en relación co procedemento seguido na elaboración do Decreto do PP e incluso manifesta de xeito literal que o Goberno galego incurriu en “numerosas irregularidades”. Ao final, o Consello Consultivo de Galicia (equivalente ao Consejo de Estado de España) chega á seguinte conclusión: «Que o proxecto de decreto polo que se regulan os servizos sociais comunitarios e o seu financiamento, resulta contrario ao ordenamento xurídico polos motivos a que se refire a consideración cuarta.»

No dereito existe o principio fundamental da xerarquía normativa. As normas ordénanse xerarquicamente de xeito que as de inferior rango non poden contradicir as superiores, baixo risco de nulidade. Isto é o que acontece aquí: un simple decreto aprobado polo PP (Decreto 99/2012 polo que se regulan os servizos sociais e o seu financiamento) non pode modificar unha norma con forza de lei aprobada polo BNG no ano 2008 (Lei 13/08 de Servizos Sociais de Galiza). Os decretos só poden desenvolver as leis, non modificalas.

De feito, o executivo de Feijóo ten a lexítima potestade de derrogar a lei. Hai outras medidas que están a tomar que atentan contra a dignidade das persoas e non vemos que lles trema a man. Poden crear, por exemplo, unha Ley Regional de la Beneficencia que substitúa a nosa Lei de Servizos Sociais de Galiza. Só terían que cambiar unha norma que outorga dereitos (a actual) por outra que dea esmolas graciables, que é o que realmente lles reina.

Por moi aburridos que sexan os informes técnicos, estes adoitan ser os que quitan e dan a razón. Xa que logo, e tendo en conta a resolución imparcial do Consello Consultivo na que se chega á conclusión de que o decreto tramitado polo Goberno de Feijóo non “regula” os servizos sociais, senón que directamente os “modifica”; todo o que se fale a maiores sobre este tema son especulacións. Non deixan de ser medias verdades que, como calquera persoa de ben sabe, fan bastante máis dano que as mentiras enteiras.

Marco López
(Portavoz do Grupo Municipal Nacionalista de Xove)
16/X/2013