O BNG da Mariña inicia a campaña informativa sobre a reforma da administración local criticando a “eliminación de servizos públcios, de manterse a actual formulación”

A Mariña, 16 de outubro de 2013. O BNG da Mariña pon en marcha unha campaña informativa sobre a reforma da administración local na que pretende achegar á cidadanía os efectos que a reforma da lexislación local imposta dende o goberno do Estado terá sobre a cidadanía. Os nacionalistas, coa presenza do alcalde de Ribadeo, Fernando Suárez e o Vice-responsábel Comarcal, Xoán Antón Estúa, repartiron no mercado de Ribadeo información sobre os efectos desta modificación lexislativa que pretende, de non modificarse, acabar con múltiples das competencias e servizos que a administración mais cercana presta á cidadanía.

Fernando Suárez afirmou que moitos dos servizos que hoxe presta o concello, de manterse a actual reforma corren perigo de desaparecer
Para o BNG a xente debe ser consciente dos efectos perniciosos desta modificación que o goberno central pretende por en marcha xa que suporá o afastamento dos servizos da cidadanía poñendo en perigo incluso o mantemento de servizos públicos clave na igualdade de oportunidades que non serán posíbeis de manterse a actual proposta do goberno central. Nesta liña o Alcalde de Ribadeo, Fernando Suárez, puxo o exemplo da Escola Municipal de Música, que non será posíbel mantela xa que coas directrices fixadas na nova lexislación un informe dun funcionario da Deputación en aplicación do sacrosanto déficit cero pode acabar pechándoa devolvéndonos a situacións pretéritas e discriminatorias entre quen poda ou non pagar unhas clases particulares.

Suárez foi mais alá ao indicar que o obxectivo desta modificación lexislativa busca a privatización de moitos servizos municipais e converterá aos representantes municipais elixidos directamente pola cidadanía en simples delegacións ou oficinas de xestión sen capacidade de decisión sobre asuntos trascendentais para a calidade de vida da xente que pasarán a ser competencia das Deputación Provinciais con representantes que nin sequera son elixidos democraticamente e están moi afastados da realidade diaria dos e das cidadáns.

Para Estúa estamos diante dunha reforma involucionista que impón o baleirado de competencias e a expropiación dos concellos galegos en favor das Deputación Provinciais
Pola súa banda, o Vice-Responsábel Comarcal nacionalista, Xoán Antón Estúa, afirmou que estamos diante dunha reforma administrativa involutiva que nos devolve aos tempos do franquismo onde para tratar calquera problema local era necesario perder o día na capital da provincia. O nacionalista explicou que esta reforma pretende o baleirado de competencias dos concellos e vai encamiñada á súa expropiación para reforzar as deputacións provinciais, ignora as características propias dos concellos galegos, pon por riba do interese social o interese económico, impedirá, suprimirá ou privatizará moitos dos servizos que hoxe prestan os concellos, especialmente os sociais e suporá a ruína da cidadanía que perderá en moitos casos a garantía dun servizo público próximo e de calidade.