A Xunta acondiciona un paseo pola beira do río Ouro que une Fontao con Transmonte, na parroquia de Santa Cilla

Foz, 9 de novembro de 2013. A Consellería de Medio Ambiente, da Xunta de Galicia, acondiciona un paseo pola beira do río Ouro no tramo que une Fontao con Transmonte, que pertence á parroquia focense de Santa Cilla. A obra, que está a piques de rematar, foi visitada polo alcalde, Javier Jorge Castiñeira, e polo concelleiro de Medio Rural, Pedro Fernández Manín.

O rexedor municipal explicou que esta actuación “está sendo executada pola Consellería de Medio Ambiente con fondos financiados totalmente por este departamento da Xunta de Galicia por un total de máis de 30.000 euros. Acondicionouse con varias pasarelas, unha delas que era unha antiga ponte que unía Fontao con Teixeira. A verdade é que quedou moi ben”.

Javier Castiñeira tamén comentou que “esta ruta foi visitada polo grupo Os Sendeiros, de Foz, que participaron dando ideas. É unha obra interesante que era lóxico facer. Permite facer ida e volta pola ruta do río Ouro, que é atravesado por unha pasarela de madeira que substitúe a unha ponte que estaba caída”.

O alcalde destacou que “no último ano e pico a Consellería de Medio Ambiente fixo varias obras neste río: retirou todas as árbores que había na canle, que era importantísimo porque estaba bastante colapsado de árbores caídas nos últimos temporais; e agora acometeuse esta obra importante, solicitada precisamente polo colectivo de Os Sendeiros, que fai varios eventos no noso concello e evidentemente nós queremos poñer ao día a Foz neste ámbito, que aparte de deportivo é turístico e atrae a moita xente e facilita tamén a practica deportiva a un colectivo con idades diferentes”.

Castiñeira anunciou que esta actuación “nos próximos días estará rematada, porque están colocando a sinalización. Por iso estamos moi contentos e queremos facer público o noso máximo agradecemento á delegada territorial da Xunta, Raquel Arias; ao conselleiro de Medio Ambiente, Agustín Hernández; e tamén á Dirección Xeral de Conservación da Natureza e Augas de Galicia, que foron os artífices desta obra”.