O PSdeG de Burela pedirá en Pleno que se regule o reparto dos cartos públicos ás asociacións de “xeito obxectivo e que permita a todas as asociacións ter opcións a estas axudas”

Dende a Comisión Executiva do PSdG-PSOE de Burela queremos facer públicas as nosas impresións despois de que o pasado luns, día 11, e como xa tíñamos feito público mantiveramos unha reunión coas asociacións que tiveron a desgraza de ser ninguneadas e desprezadas polo equipo de “desgoberno” de Burela no reparto das subvencións que se fixo fai poucas datas por parte do mesmo.

Esta reunión tiña un carácter informativo, e nela, lle entregamos a cada unha das asociacións a documentación onde figuraban as partidas, a motivación e as asociacións ás que si se lle concedían asociacións.

A primeira cousa que lles chamou a atención, foi a explicación do porque se concedía a subvención xa que segundo esta explicación, calquera das asociacións presentes na reunión poderían perfectamente ter dereito á concesión da mesma.

Outra das críticas que nos expuxeron foi a de que se concederan subvencións a asociacións que non están constituídas legalmente como tal, algo que nos xa tiñamos denunciado publicamente, e que confirma que o reparto destas subvencións foi cando menos lamentable.

Dende este grupo de asociacións discriminadas por parte do equipo de “desgoberno” de Burela, tamén nos manifestaron que tiñan remitido unha solicitude de reunión ó Sr Barcia para que lles explicara de primeira man o motivo da súa exclusión destas subvencións pese a que son asociacións que fan actividades todo o ano.

Dende o Grupo Municipal do PSdeG-PSOE de Burela se lles explicou que nos anos do goberno do Sr Llano, existían unhas bases polas que se rexían este tipo de axudas e nas que se contemplaban uns criterios obxectivos e ante os que todas as asociacións partían con opcións a estas subvencións, que non se usaron neste reparto. Este reparto fíxoo o “dedo” do Sr Barcia co resultado que estamos a comprobar.

Por todo isto, o PSdeG-PSOE vai a pedir en Pleno que se usen as bases existentes, ou que se non gustan estas, se regule de algunha maneira o reparto destes cartos públicos, esixindo que este reparto sexa público, obxectivo e que permita que todas as asociacións podan ter opción a estas subvencións sen depender de que se lle caia máis ou menos simpático ó Sr Barcia e a o seu equipo de “desgoberno”.