Vázquez Tallón, candidato á coordinación provincial de XXSS de Galicia: “A marca A Mariña debe ser potenciada no seu conxunto para lograr dinamizala”

Jesús Vázquez Tallón preséntase ó Congreso Provincial Extraordinario das Xuventudes Socialistas de Galicia, coa intención de lideralas na provincia de cara ós próximos anos. Este lucense está a levar a cabo visitas ó longo de toda a provincia, para coñecer a realidade de cada unha das agrupacións e concellos.

Como ve este proceso provincial?
É un proceso apaixoante, cheo de ilusión e ganas, que me está permitindo aprender moitas cousas dos diferentes militantes da provincia, que son cos que debemos intentar reverter esta situación de falta de credibilidade da política por parte da sociedade. Estou aberto a incorporar todas e cada unha das propostas para acadar unas Xuventudes plurais e efectivas, no eido político, orgánico, ideolóxico e social.

En A Mariña, cales cre que deben ser as prioridades?
A comarca de A Mariña, composta por 17 concellos, ten unha grande diversidade, de aí que cada unha das zonas ten unha riqueza cultural e social totalmente diferente, aínda que a marca A Mariña debe ser potenciada no seu conxunto para lograr dinamizala, valorando xa de por si que é unha referencia para a nosa provincia. Considero que a finalización da autovía, cun grande retraso nos prazos de execución, vai axudar a dar un salto cualitativo no eido turístico, aínda que demando un plan turístico efectivo e real, que potencie os recursos da zona e que a faga crecer, económica e socialmente. Na miña opinión, outro aspecto clave é a fixación da poboación, xa que son moitos os xóvenes que se van formar fóra e xa non retornan á zona por falta de oportunidades, ó igual que como é obvio, a potenciación dos recursos do mar, que son a forma de vida de moitas persoas da comarca e onde se debe esperar un maior investimento da Xunta, xa que é unha zona que sae perxudicada con respecto a outras zonas marítimas galegas.

Como ve ó PSdeG en A Mariña?
O PSdeG, ten representación na comarca tanto nos eidos institucional como orgánico, ademáis de ter un gran número de compañeiros e compañeiras que son activos necesarios neste partido, en todas e cada unha das agrupacións locais, mantendo a esencia do municipalismo e estando en contacto necesario coa cidadanía. Agora éntrase na segunda fase da lexislatura e hai que empezar a pensar en que debe ser o mellor en cada concello de cara ás eleccións municipais de 2015. Tras o congreso provincial, creo que Mayra García fará un excelente traballo como coordinadora provincial.

E en Xuventudes Socialistas?
Estamos a traballar con cada unha das agrupacións locais do PSdeG, para impulsar e dinamizar as agrupacións de Xuventudes, á vez que traballamos para que estean na totalidade da comarca. Creo que hai que mencionar o traballo de Cristina Losas ou Adrián Longarela, entre outros.

No tocante ó contexto galego e provincial, son Besteiro e Santín os líderes adecuados?
Si, sen lugar a dúbidas. Gómez Besteiro representa todos os ideais do partido no tocante ó seu liderazgo político e persoal, e ben certo que será o próximo Presidente da Xunta de Galicia. Desde logo, traballamos e traballaremos para que saque a Galicia desta situación tan complexa na que estamos, e creo que é a persoa adecuada. Ten todo o meu apoio.

En canto a Santín, outro tanto do mesmo, é unha persoa que medrou moito políticamente nestes anos e ten tanto capacidade política como de xestión, de aí que entendo que é o líder adecuado a nivel provincial, que nos pode guiar a uns grandes resultados electorais. Finalmente, non me quero esquecer do grandísimo traballo que fan outros compañeiros, para que o PSdeG poda ser unha realidade no gobernó dos diferentes eidos, de aí os meus parabéns.