Economía e Industria investiu 44.500 euros na mellora das infraestruturas dos parques industriais de Cervo e Lourenzá

Cervo, 6 de decembro de 2013.- A Consellería de Economía e Industria investiu 44.500 euros na mellora das infraestruturas dos parques industriais de Cervo e Lourenzá, segundo destacou a delegada territorial, Raquel Arias, durante unha visita ao polígono cervense.

A delegada, que estivo acompañada polo alcalde cervense, Alfonso Villares, subliñou “o traballo de colaboración que está a desenvolver o departamento autonómico coas administracións locais para contribuír á mellora da competitividade dos parques empresarias de Lugo”.

Así, informou de que a Consellería de Economía e Industria sufragou nos últimos meses obras en 11 parques empresariais da provincia para renovar ou habilitar novas infraestruturas “co obxecto de motivar o esforzo común por incrementar a competitividade da oferta de solo empresarial como elemento dinamizador da economía e do emprego local”.

Neste sentido, no concello de Cervo procedeuse á repavimentación dos accesos ao polígono, mentres que en Lourenzá investiuse nos sistemas de seguridade e vixilancia. Ao abeiro desta liña de axudas da Xunta, acometéronse noutros parques empresariais proxectos de eficiencia enerxética coa substitución de luminarias, xestión de residuos e reforma de infraestruturas e dotacións comúns en xeral.

Raquel Arias incidiu na importancia de “consolidar polos industriais sólidos, coas máis modernas infraestruturas e dotacións tecnolóxicas, que resulten atractivos para os emprendedores e sexan realmente elementos xeradores de emprego local e de progreso para a economía galega”.

A delegada lembrou que “segue vixente a vontade da Xunta de exercer unha discriminación positiva coa provincia de Lugo para favorecer o reequilibrio territorial”, que se traduce en que os concellos lucenses obtiveron unha porcentaxe máxima de axuda do 85%, maior en cinco puntos á establecida con carácter xeral.

Na mesma liña, apuntou que os orzamentos da Xunta de Galicia para o 2014 manteñen a filosofía do “crecemento solidario”, que se traduce en dedicar case 8 de cada 10 euros a gasto social, pero tamén nunha aposta por “corrixir os desequilibrios territoriais”.