O Colectivo de afectados polo Decreto de comedores celebraron en Cervo a décimo terceira concentración

Este venres 13 de decembro o colectivo de afectados polo Decreto de comedores concentráronse no CEIP de Cervo ás 16.30 horas, mantendo a nosa protesta polas consecuencias do Decreto de Comedores, ante a Consellería de Cultura, Educación e Ordenación Universitaria.

“Levamos 13 semanas xantando cos nosos fill@s no parque ou na retoral os mércores e concentrándonos os venres diante do CEIP e os responsables da Consellería aínda non tiveron tempo de responder aos nosos escritos, de entablar un diálogo cos pais e nais afectados; mais non sorprende, cando non tiveron en conta a postura do Consello Escolar de Galicia á hora de elaborar este Decreto de Comedores”.

“O Decreto, deseñado desde o entorno urbano, non contempla as circunstancias d@s alumn@s do rural, aqueles aos que a administración ten que garantir os servizos necesarios para seren escolarizados no centro educativo máis próximo, xa que carecen de escola na súa poboación. Tampouco resolveu a falta de comedores no ámbito urbano, onde non había segue sen haber servizo”, critican.

“Levamos meses buscando e valorando unha solución. Sabemos que desde o CEIP solicitaron a ampliación de prazas de comedor, ante a demanda de matrícula, denegadas polo Consellería. Que o Concello ofertou transporte a mediodía, xustificándoo como medida de apoio a matriculación, medida que decae, cando a Consellería só garantiza ao Centro para o alumnado da área de influencia, e cando xa explicamos que os transporte a medio día é inviable, por non dar tempo a volver ás clases da tarde, someter aos nenos e nenas a uns desprazamentos diarios agotadores e estresantes, discriminándoos no tempo de xogo e actividades”.

Así, “mantemos ante os/as responsables do noso Concello a nosa petición de apoio as familias mediante becas de axuda á escolarización axudando a financiar o gasto de comedor a tod@s @s alumn@s empadronados no noso Concello que estudan nos Centros Públicos, paliando así as deficiencias do Decreto de Comedores da Xunta”.

“Resúltanos paradoxo que a Xunta de Galicia retire o dereito compensatorio de servizos como o comedor escolar e que o trasporte poda correr a mesma sorte, mentres desenvolve unha nova campaña para asentar poboación no rural”. Por iso, “suxerimos que a mellor inversión, a mellor campaña para o rural é dotalo de recursos que garantan a igualdade de oportunidades para os nenos e nenas que nel viven e vivirán no futuro”.