A maxia da Mariña lucense, no pavillón de Galicia en FITUR

Madrid, 22 de xaneiro de 2014.- A provincia de Lugo estivo representada na Feira Internacional de Turismo de Madrid con dúas presentacións sobre os destinos Lugo cidade e Mariña Lucense ás que acudiron axentes, operadores, prensa especializada e profesionais do turismo que se dan cita estes días na 34 edición deste certame.

En relación coas potencialidades turísticas do destino Lugo Cidade, a directora de Turismo de Galicia, Nava Castro Domínguez comentou que o feito de ter un recurso con declaración de Patrimonio da Humanidade, unido á súa magnífica oferta de turismo urbano e cultural, así como ao turismo de saúde e mais ao paso do Camiño Primitivo pola cidade converte a Lugo en un destino con grandes posibilidades para a captación de diferentes segmentos así como para reducir a estacionalidade do destino.

A este respecto, explicou que Lugo experimentou entre xaneiro e novembro un incremento nas pernoitas contabilizadas do 8,6%. Segundo matizou, o mercado internacional na cidade subiu nese período máis dun 38%, a porcentaxe máis elevada de suba do turismo internacional dos destinos urbanos de Galicia. Ao tempo, lembrou que no ano 2013, máis de 6.800 peregrinos percorreron o Camiño Primitivo.

A respecto do destino Mariña Lucense, a directora de Turismo de Galicia incidiu na súa gran oferta vinculada ao patrimonio natural e á gastronomía de alta calidade, así como á artesanía. De igual modo, recalcou a aposta pola introdución na oferta turística de produtos innovadores e con gran potencial de diferenciación, como a Ruta en tren turístico dos Faros de Galicia, que recolleu un gran éxito nesta primeira tempada de funcionamento e que constitúe un modo moi singular de coñecer os recursos turísticos do territorio.

Ao tempo, comentou que máis de 13 mil peregrinos percorreron o Camiño do Norte, a terceira ruta en afluencia de peregrinos. Nava Castro incidiu ademais no feito de que entre xaneiro e novembro A Mariña rexistrou un incremento na cifra de viaxeiros aloxados nos seus establecementos hoteleiros do 25% en relación ao mesmo período do ano anterior.

De igual modo, resaltou as potencialidades dun destino que atesoura reclamos como a Praia das Catedrais, no primeiro lugar dos top 10 destinos de praia de España segundo Tripadvisor, ou a Semana Santa de Viveiro, con declaración de Festa de Interese Turístico Internacional.

Nas presentacións das campaña da cidade de Lugo e da comarca da Mariña estivo tamén presente a delegada territorial de Lugo, Raquel Arias. Arias destacou “o forte incremento experimentado polo sector na provincia, á cabeza nesta subida dentro da comunidade ao longo do último ano”.

Referíndose á presentación da Mariña, máxica por natureza, Arias subliñou o esforzo realizado pola Administración autonómica, que a través dunha decena de programas e iniciativas “actuou de maneira importante, cóbado con cóbado co sector e cos entes da zona, para dinamizar o sector, sobre todo, fóra de tempada”.

Esta é a senda de progresión que queremos, agregou Arias, que indicou que a Mariña presentase en Fitur “como un destino de mar diferenciado, no que se conxuga gastronomía, artesanía, deportes activos e turismo mariñeiro”. Un destino que “agora está máis cerca”, grazas á nova autovía, e “que está innovando constantemente para ofrecer aos turistas alternativas ao sol e a praia para todas as épocas do ano”.