O grupo de teatro do CC Ollomao estrea unha nova obra o sábado 11 de xaneiro en San Miguel de Reinante

“Oé, Oé, Oé”, a obra de teatro escrita por Maxi Rodríguez, foi a escollida para ser a segunda peza que representará o grupo de teatro do Colectivo Cultural Ollomao de Barreiros, ao longo do presente ano. O citado grupo iniciou a súa andaina a comezos do 2013 chegando a facer ata 12 funcións da súa primeira obra “Os vellos non deben de namorarse” ás cales asistiron máis de 3000 persoas.

Un ano despois, o pavillón de San Miguel de Reinante volverá convertirse nun auditorio para acoller a primeira representación de “Oé, Oé, Oé”, unha obra que tentar poñer a reflexionar sobre a pasión futbolística como escusa para desviar a nosa atención da crise e demais problemas que nos afectan. Nun primeiro momento esta obra ía ser estreada o día 4 de xaneiro, data que consta na cartelería publicitaria, coincidindo coa data de presentación da grupo de teatro no 2013, mais por motivos de saúde dun dos protagonistas, a organización decidiu aprazar a estrea ata o sábado 11 de xaneiro. Será ás 8 da tarde.

A entrada a este acto tén un prezo de 2€, recaudación que o Colectivo Cultural Ollomao destina ao mantemento e cobertura dos gastos do grupo de teatro. As entradas estarán dispoñibles na venda anticipada a partir da fin de semana nos bares de San Miguel de Reinante e máis o mesmo día da función en taquilla, que abrirá ás 7 da tarde.

Asimesmo, a organización planificou xa unha xira por varias das parroquias de Barreiros, que comprende un total de 9 funcións ata o mes de xullo. A próxima cita terá lugar no centro social de San Xusto de Cabarcos, o domingo 19 de xaneiro ás 5 da tarde.