A Xunta asesora en Cervo aos promotores de 20 proxectos empresariais da Mariña para poñer en marcha o seu negocio

Cervo, 6 de febreiro de 2014.- A delegada territorial, Raquel Arias, inaugurou este xoves o Seminario para a elaboración do plan de negocio que desenvolve a Xunta de Galicia en Cervo e no que participan os promotores de 20 proxectos emprendedores da Mariña.

Arias destacou o interese que espertou na comarca esta actividade que desenvolve o Instituto Galego de Promoción Económica (Igape) e na que os emprendedores poden consultar cos técnicos cuestións concretas do seu proxecto grazas ás titorías personalizadas.

O obxectivo deste seminario é proporcionar aos participantes de ferramentas sinxelas e útiles para que poidan elaborar o seu plan de negocio e determinar a viabilidade do seu proxecto. Para elo, ademais das sesións informativas xerais, haberá titorías para valorar a viabilidade técnica, económica e financeira de cada iniciativa concreta, así como as fontes de financiamento ou as cualidades emprendedoras do propio promotor.

A delegada referiuse a esta acción formativa como “un punto de partida para os vosos negocios, e tamén un punto de encontro coa Xunta de Galicia a través do Igape”, e engadiu que “a Xunta ten múltiples ferramentas para apoiar os proxectos emprendedores, para impulsar as ideas sólidas, sustentadas en plans de negocio e financeiro serios”, de feito que estas ideas “sexan susceptibles de prosperar, de xerar postos de traballo e, polo tanto, riqueza para o emprendedor e para o seu entorno”.

Arias explicou distintos programas de axuda que desenvolve o Igape, tanto para a posta en marcha dunha empresa como para o seu desenvolvemento posterior, promovendo o deseño de novos produtos ou a saída ao mercado exterior, entre outras posibilidades de crecemento.

Igualmente, referiuse ao labor da Axencia Galega de Innovación (Gain), que fomenta cos seus plans de actuación a transferencia de coñecementos, o desenvolvemento tecnolóxico e a innovación das empresas.

En suma, destacou, “a Consellería de Economía e Industria arranca o ano poñendo a disposición das Pemes 45 millóns de euros en programas de axudas”, destinados a apoiar os grandes investimentos empresariais, a creación de emprego e a posta en marcha de novas empresas, así como a consolidar e mellorar a competitividade das xa existentes e impulsar a súa internacionalización.