Belén Meitín proclámase campioa da Liga Sénior Feminina de Bolos de Xove

Fon 38 os participantes na tirada de Vilachá da Liga de Bolos de Xove.

Liga Sénior Masculina
Non foi posible nesta tirada. Álex Meitín terá que esperar á vindeira tirada de Morás para proclamarse matematicamente vencedor desta XXVª edición da tirada de bolos de Xove; xa que o seu segundo posto non foi suficiente. A pesar de que ampliou a súa vantaxe a 25 puntos sobre José Rafael, aínda quedan 26 máximo por disputar (12 puntos máis un punto da bolada en cada unha das dúas tiradas que quedan). O mesmo que Alex, Rafa tampouco puido pechar matematicamente o seu subcampIonato, xa que ten os seus inmediatos perseguidores a 24 puntos. Con toda seguridade, ambos certificarán en Morás as súas respectivas posicións.

Por detrás, Jose Vigo amplía a súa vantaxe sobre os tres inmediatos perseguidores, e con 90 puntos aumenta as súas opcións ao podio final. Tamén por detrás, Sócrates Campo con 83 puntos e posibilidades aínda de ascender, Arturo Vigo con 82 puntos, lesionado do brazo dereito e practicamente descartado desta liorta, e Francisco Pérez, quen con 80 puntos logra sumarse a ese grupo perseguidor de Jose Vigo. Polo tanto, nas dúas tiradas que quedan veremos unha forte loita por esa terceira praza no podio final.

Aínda así, segundo as Bases e Normas desta Liga, ademais dos tres primeiros, hai premios e trofeos para os 12 primeiros clasificados.

Liga Sénior Feminina
Con Belén xa campioa, nesta Liga aprétase máis, se cabe, a clasificación e a loita polas dúas prazas que quedan no podio. Dolores Baño e Paula Campo non foron capaces de puntuar, o que aproveitaron Salomé Bermúdez e Concepción Piñeiro para achegarse na clasificación. Aínda así, Dolores Baño ten unha respetable vantaxe de 7 puntos sobre as súas inmediatas perseguidoras, o que a fai claramente favorita para obtención da segunda praza final. Para o terceiro posto, practicamente nun pano, temos a Paula Campo e Salomé Bermúdez con 38 puntos, e a Concepción Piñeiro con 36.

Segundo as Bases e Normas desta Liga, ademais das tres primeiras, hai premios e trofeos para as 5 primeiras clasificadas.

Liga Sub 18
A vitoria de Daniel López, ao que se sumou o magro 4º posto acadado por Salomé Cardoso, fai que con 9 puntos de vantaxe e dúas tiradas por disputar, Daniel López sexa virtual vencedor desta competición. O máximo de 12 puntos que quedan por disputar (6 máis 1 da bolada en cada tirada) fan que a Salomé lle sexa moi difícil recuperar eses puntos no pouco que queda por xogar. Iso sí, Salomé, con 11 puntos de vantaxe sobre os seus perseguidores ten practicamente asegurado o subcampionato. Polo tanto, podemos dicir que queda un posto de honra por disputar; para esta terceira praza temos a Isaías Cardoso con 45 puntos e que recuperou esta semana esta posición, e a Miguel López con 43 puntos, que leva dúas tiradas (a de A Vara e esta de Vilachá) sen puntuar. Polo tanto van ser eles dous os que lle aporten emoción a esta Liga nas dúas últimas tiradas que restan.

Segundo as Bases e Normas desta Liga, ademais dos tres primeiros, hai premios e trofeos para os 5 primeiros clasificados.

A vindeira tirada terá lugar no CENTRO SOCIAL DE MORÁS o vindeiro sábado 22 de febreiro de 2014.