Unifoz pon de manifesto a “irresponsabilidade do goberno local pola forma e o fondo da solicitude dun obradoiro de emprego con Alfoz, Valadouro e Mondoñedo”

Os concelleiros de Unifoz votaron este venres a favor da solicitude dun obradoiro de emprego xuntos cos Concellos de Alfoz, O Valadouro e Mondoñedo denominado ‘Pardo de Cela’ nun Pleno convocado con carácter de urxencia.

O seu voto a favor arguméntase por “responsabilidade e para que o acordo fora respaldado por unanimidade da Corporación”; aínda que, UNIFOZ quixo recordar unha nota que fixo pública o 11 de xaneiro de 2014 “a que este goberno nin fixo caso, como de costume”. Nela, pedían ao goberno do PP de Foz que “o Concello tería que presentar un proxecto serio, que teña dous obxectivos fundamentais: formación, e realizar proxectos necesarios para o Pobo, así mesmo consulte coas asociacións de veciños sobre necesidades de actuacións en parroquias, para melloras de centros sociais públicos, e novas actucións, así como traballar en accesibilidade e seguridade víal no Pobo, nun proxecto dun museo etnográfico relacionado coa ruta do río Ouro e os Muíños do río Centiño”. Así mesmo, consideraban necesaria “a posta en valor de puntos de interese turístico coma Flouxeira, Os Castros, con paneis de interpretación, sinais de rutas….”

Visto o extracto do proxecto que se presentará Unifoz entende que “é un proxecto pouco imaxinativo, e sen pensar nas verdadeiras necesidades do Pobo. Resulta que se realizaran labores de limpeza no río Ouro e Moucide, cousa que é competencia da Xunta de Galicia”, afirman.

Polo mesmo, UNIFOZ pídelle ao goberno do PP de Foz que no proxecto se inclúan:
-Melloras de accesibilidade para o pobo en espazos públicos e vías públicas, segundo proxecto que consta no propio Concello.
-Melloras en edificios públicos, como Casa da Cultura e o propio Concello, que están moi deteriorados.
-Que se inclúan tamén o río Centiño, para potenciar a ruta dos Muíños
-Que se inclúa no proxecto a mellora de espazos verdes que se sacou a concurso para unha empresa privada, pois de este xeito o Concello podía aforrar 36.000 € para o presente ano 2014.
-Que se lle de publicidade as bases do abradorio, tanto para os alumnos/as, como para a contratación de monitores.