Outeiro demanda o apoio de todas as forzas políticas do Estado para que as persoas afectadas polas preferentes “cobren a totalidade dos seus aforros”

Lugo, 21 de marzo de 2014. O delegado de Cultura e Turismo e portavoz do BNG na Deputación de Lugo, Mario Outeiro, anunciou na rolda de prensa posterior á Xunta de Goberno da institución provincial, o apoio aos afectados polas participacións preferentes e subordinadas que, unha vez cumprido o prazo de 90 días establecido polo novo dono de Novagalicia Banco para ofrecerlles unha solución en firme, a entidade bancaria segue sen proporcionarlles unha saída á súa difícil situación.

Segundo explicou Outeiro, “dende a Deputación de Lugo vimos denunciando o espolio que están a sufrir as afectadas e afectados por estes instrumentos híbridos de capital dende que se destapara a existencia destes produtos financeiros, máis aínda cando se teñen utilizado miles de millóns de euros de diñeiro público para rescatar á banca, máis de 9.000 millóns no caso de NGB, en detrimento de servizos públicos básicos que afectan á maioría da cidadanía”.

“Estamos ante unha estafa, – continuou o delegado- tanto a nivel económico como a nivel moral e social, que afecta a máis de 35.000 galegas e galegos, que viron como se ten xogado cos seus intereses por parte dunha entidade que, a día de hoxe, aínda non deu ningunha explicación acaída dos motivos que a levaron a anunciar publicamente unha solución que chegaría en 90 días, e da que aínda non se teñen noticias”.

O Parlamento Galego aprobou por unanimidade, a semana pasada, a proposición de lei presentada polo Bloque Nacionalista Galego para que o colectivo das afectadas e dos afectados polas participacións preferentes cobren a totalidade dos cartos investidos. Un colectivo que a pesares das promesas incumpridas do señor Escotet, segue a reivindicar os seus dereitos con apoios como o do Bloque, e que de novo onte, se manifestou nas distintas oficinas que NGB ten por toda Galiza.

Neste sentido, a Vicepresidencia da Deputación de Lugo demanda o apoio de todas as forzas políticas do Estado representadas no Congreso dos Deputados á proposta do Bloque que xa foi aprobada por unanimidade no Parlamento Galego, co fin de esixir ao señor Escotet unha solución inmediata para as máis de 35.000 persoas que, en Galiza, foron enganadas pola entidade financeira da que agora é responsábel. “Non queremos que ocorra o do pasado 28 de maio cando o Partido Popular en Galiza votaba a favor dunha moción de apoio aos preferentistas, mentres que en Madrid rexeitaba a iniciativa” – concluíu Outeiro.