Ana Miranda (BNG) levará novamente a Bruxelas a problemática existente na praia das Catedrais

Ribadeo, 30 de abril 2014.- A cabeza de lista do BNG ao Parlamento Europeo, Ana Miranda, levará novamente a Bruxelas o problema de masificación e falla de medidas de conservación existente na praia das Catedrais. A candidata nacionalista aproveitou a súa visita á comarca da Mariña, onde mantivo un encontro co sector turístico en Ribadeo, acompañada polo alcalde, o nacionalista Fernando Suárez, para abordar a problemática existente no principal reclamo turístico da comarca.

A candidata do Bloque esixiu, como tamén demanda o Concello de Ribadeo e o propio sector turístico, “a posta en marcha inmediata por parte da Xunta de Galiza dun Plan de Usos para este entorno protexido”, que forma parte da Rede Natura e está declarado Lugar de Interese Comunitario (LIC). Ana Miranda afirmou que a Semana Santa “foi un aviso” pero que “no verán verase claramente a dimensión do problema”.

Por iso, a eurodeputada nacionalista anunciou que esta mesma semana se porá en contacto coa Directora Xeral de Medio Natural, a italiana Pia Bucella, que visitou As Catedrais en febreiro do ano pasado, para informala da situación que se está a dar neste neste espazo da Rede Natura e solicitarlle que esixa á Xunta a “aprobación urxente” dun Plan de Usos que evite o deterioro deste enclave.

Ana Miranda afirmou que As Catedrais “é un dos grandes reclamos turísticos de Galiza e debemos conservalo e protexelo a través dunha utilización racional deste entorno para que siga a ser un motor para o despegue do sector turístico na comarca da Mariña”, defendeu. Por iso, acusou á Xunta de “abandonar as súas obrigas” e “deixar só ao Concello de Ribadeo” neste asunto.

Aposta por un “turismo racional”
A cabeza de lista do BNG ao Parlamento Europeo defendeu a posta en marcha dun “turismo racional” na comarca da Mariña, que cree riqueza e postos de traballo, fronte ao “modelo Barreiros” de turismo, “totalmente insostible e agresivo para o territorio e o medio ambiente”, criticou.

Na mesma idea insistiu o alcalde ribadense, o tamén nacionalista Fernando Suárez, que afirmou que “Ribadeo e a comarca da Mariña quere seguir tendo na praia das Catedrais un reclamo turístico de primeira magnitude, mesmo a nivel internacional, pero para iso é necesario conservar ese espazo e evitar a súa degradación para non matar a galiña dos ovos de ouro”, dixo. Esta mesma idea defende o sector turístico da comarca, segundo quedou de manifesto onte no encontro celebrado polo BNG no Parador de Ribadeo.

A voz da comarca da Mariña en Europa
Fernando Suárez participou este mércores, xunto a outros membros do BNG da Mariña, nun reparto informativo no Mercado ribadense, onde informaron aos veciños e veciñas das propostas do BNG para Europa. Os nacionalistas defenden “outra Europa, social e democrática, que respecte aos pobos, coma o galego, que queren decidir o seu futuro”, fronte á Europa actual, “a dos mercados e mercaderes, a dos recortes e o gran capital”.

Os nacionalistas explicaron tamén no Mercado ribadense o traballo feito polo BNG no Parlamento Europeo dende 1999, primeiro con Camilo Nogueira como eurodeputado e nesta lexislatura con Ana Miranda. O Bloque afirma que “Galiza estivo voz en Europa grazas ao BNG”, que defendeu na Eurocámara “sectores estratéxicos para a comarca da Mariña”, como o lácteo ou o pesqueiro. Fernando Suárez asegurou que Ana Miranda volverá a ser nesta lexislatura “a voz de Ribadeo e da comarca da Mariña en Europa”.